Yaongyimsen nung election timi agitsü lemtet

Dimapur, March 24 (TYO) : Yaongyimsen yimtak March 22 nungi 23, 2017 tashi Yaongyimsen Baptist Arogoi arishi küm 65 ser teküpbok purtem asoshi “Clean Election Seminar” sentong ka “Ochi aser Tangatetba akaba Senso Tajung ka” omen nung ajemdaker kanga temoatsü aser tajangzük lia ayongzüka mongogo.
Iba sentong nung shisalen teyurtemji Rev.Dr.Imchayanger aser Tir Yimyim yimozülur Wb.K.Temjen Jamir na liasü.
Iba sentong nung jembidang, Rev.Dr.Imchayangeri nübortem dang Tsüngremi nisung yangluba nükjidong ya alima nung rongsen ajak madak ketdangser küma alitsü yanglu, anungji asenoki rongsen nem asenok mekokdaktsüi asenokiang rongsen madakji ochishia ketdang asütsübaji kanga tongtibang teinyaktsü mapa lir ta Lai o nungi agiteta tekümdangtsü o shia liasü. Paisa ochimashi mapa ajanga rongsen bener aruba aser rongsen yong pei temeten ayokbaji pei taküm asoshi lendong lir ta metetdaktsü.
Kasa sentong nung, K.Temjen Jamiri jembidang, “alima nung aliba ya tebok sünga alitsü asoshi dangbo masü saka senso tajung ka küma alitsü asoshi Tsüngremi yok ta angatetdi,” ta metetdaktsü. “Tebok asüngtsü dang bilemra Ochi ayoktsü; Tebok asüngtsü dang bilemra tangatetba agi anüngtsü; Tebok asüngtsü dang bilemra shisatsü masü sen dang meshitsü aser Tebok asüngtsü dang bilemra ango aputsü tasa masü ango-ang meshitsü,” ta paisa metetdaktsü.
Iba shisatokden sentong nung adenertem rongnung telok ter küma lemsar shisalemsatepba sülen iba ‘seminar’ nung adenertemi ” Tsüngrem tenüng nung tang nungi Election dak sendakba maparen nung tashiyim aser ochimashi mapatem nem mekokdaktsüi pei tangatetba nung ochishia pei vote peisasa enoktsütsü aser ano, election nung tokteper candidate-tem rongnung Tsüngrem akümtsübuba aser nübortem meimba nisung, shibai nübortem asoshi jembitettsü aser inyaktettsü akok, pa mesüra laji yaritsü,” ta telemetba agia liasü.