Yaongyimsentsür lokti senden amonger

Yaongyimsen, September 28 (TYO): Yaongyimsen Tetsür Telongjem asembuba lokti senden sentong ka Brihostibar aonung Yaongyimsen yimtak “Apijem Tetsür” omen nung ajemdaker tenzükogo.
Iba senden mezüng sentep nung tongti o jembir, Wt. Alemla Samuel-i jembidang, tetsürtem ya alima tesangwa, anungji iba tesangwaji mesamadaktsüi kibong nung apijema, liromedema inyakba aser nüktsü yima sarasademba tetsür ka asütsüsa khuret abentsüla, ta metetdaktsü.
Tarutsü putu yanglutsürtemji tetsütem lir, aji oda kechisarina tongtibang tamendakdak nüngjakoja ajak tetsü tenüng enoksema Motherland, Mother tongue aser mother board ta ajaba tetezü, maongka aser khuret ya tetsür ajaki angateta pei taküm agi tatishitsü tajung küma alitsü asoshi Wt.Alemla-isa ayongzük.
Iba sentong nungsa tayongzükba o Nagaland Co-operative Societies nung Senior Inspector Wt.Imtilai jembi aser tepela o Yaongyimsen Baptist Arogo nung sannüker Wb.O. Chuba Aier-i ashi aser tarur pelaa agizükba o YTT tir Wt. Akangmenla-i metetdaktsü.
Iba sentong Yaongyimsen Baptist Arogo nung Christian Education Department purtemi lapoktsü aser YBC nung tetsür tesayula Wt.Anungla-i sentong len ania liasü. Iba senden tenzüka Liroyim nung tetsür tesayula Wt. Limala-i sarasadem aser Nükshiyim unit nungi ken tajung ka aten.
Iba senden nung Nagaland tesem ajaklen nungi Yaongyimsentsürtem adenshia dendagi. Iba senden sentong ya September 29, 2017 nü tembangtsü.