Yarinüba tanüla !

Tanü Nagaland nung tatsük-talem osang kaji Nagaland anüdoklen (Eastern Nagaland) district pezü kübok aliba sorkar school-tem nung tesayur peria meyok nungbo tan November ita 24 nü nungi longkak aittsü ta Eastern Naga Students’ Federation (ENSF) teloki metetdakja lir. Iba osang jagi state sorkar nung yimsüsür aser ketdangsertemi teküpbok tia nung alirtem anitettsü asoshi temulung agüja meinyaker ta metetdaktsür. Nagaland nung lenirtemi tebang agi jembiba ama inyak nungbo school nung tesayur agi meperiba tebilemtsüjibo malitsüla. Aji oda, tang tashi Nagaland tesadang ka nung aliba sorkar school-tem nung tesayur peria meyoktetba sorkar aser talisa School Education department-jibo nübortem matsüngdang tadok meshi langa lir. Nagaland nung School Education department aliba yabo lia lia Naga nunger tanurtem dang kaketshisatsü tajung agüja senso tajung kaka kümdaktsütsü meranger masü saka akok tashi ochimashi mapa inyaktsü asoshi lapokba industry-ang ka mesüka kümogo. Iba jagi Nagaland arar. Tanü Nagaland tilaka nung ya anüdok aser anüluolen alirtem na tsüngda kaketshisatsü angazükba aser alima renlokba nung memedembaji yimsüsür aser ketdangsertemi pei nübor memeimba ajanga lir. Iba jagi kasa Naga nungersa süaka anüdok aser anululen alir Naga nunger tsüngda temulung mechitep adoker, iba jagi Naga nunger melongjemer. Atangji, Nagaland anüdoklen aliba sorkar school-tem nung tesayur peria mali saka anülulen aliba school-tem nungbo tesayur talila lir ta asüba tensa tiaji kangasa meshitak. Iba jagi Nagaland liromedema mainer. Aji oda, Nagaland anüdoklen alir tanurtem dang sayutsü asoshi tesayur peria malibaji sorkar asoshibo tamakok ka dang asütsüa akok, saka jungjunga bilemdangdi süra Naga nunger anülulen alirtem asoshibo maksü tulu lir. Akhidang, sorkar school peria lapoka malidangbo Nagaland anüdoklen alirtem asoshi Ao kin nungi tesayur peria liasü. Item tesayurtem dakji tangar teküpbok tia nung alir memetetba purtem dang sayutsü tejangraba tulu liasü. Parnok jagi Nagaland anüdoklen gari agi matongdak kecha memetetba purtem aliba osang angashir kidang pei yipten nung amuia mouteti nüken. Iba tanüla tarongba jagi tangar yaritsü aser sayutsü temulungtetba tulu nung tetsüng agi anogosa anogo agia jajaa orr anüdoklen alir tanurtem dang A,B,C aser 1,2,3 sayua nüchi kümdaktsü. Tanü iba tanüla tejangraba to asenok dak nungi kodaser piladaktsü ta Aotsür Aortemi shisadangtsüla. Aji oda, tangar memetetba purtem meteta kümdaktsünüba tejangraba to ano ken asenok mulung nung jangrudaktsütsüla. Asenoki (Aori) meinyakra, state sorkari meinyaktsü, asenoki meinyakra Naga nunger anüdok aser anülulen alirtemi meinyaktsü aser asenoki tama orr nüngdakba purtem meyaritetra asenoki meshiba naroküm “Samanirtem lima” ( Land of Pioneers) Naga nunger nem meyipa agütsütsüsa akümtsü. Tawa Nagaland anüdoklen nungi adokba yimsüsür kati anüdoklen aliba sorkar school-tem semdanga aodang, pai yangji tesayur peria maliba putet. Ajisüaka, pai item school nung azünger tanurtem dang lesson meranga bushir tatidang agütsütsü ajungshi aser class ter tatidang nung junga takok ngura, pai sen agütsütsü nangzük. Iba ama ajungshibaji junger amato saka jungjunga bilemdangdi süra tanurtemi meranga bushinüyonga tesayur melira komaser lesson angateta bushitsü ? Tanurtem jagi temetet takok anguba sempet senji aginütsü saka tesayuri mesayuba lesson bushia takok angutsübaji kanga tasak asütsü. Aji oda, tesayur maliyonga lesson meranga bushiang ta ajungshitsü melen yimsüsüri pei lima aser pei yimtsüng nung tangsa tesayur yokang ta pei sorkar dang akang nungbo koda tajungba süla ta bilemer. Iba jagi anüdok aser anülulen alir Naga nunger yimsüsürtem dak pei nübor teküpbok tia nung alirtem yarinüba shisatsü malia ta sayur. Yimsüsür aser ketdangser akümbaji gari tajung nung siren light pereta, body guard anir, neck tie mesür, korang semer anemsü agi temeim sayur ama tiyazü jembia senzütsüba masü, saka alii alur pei nübor timtemba tia nungi anitettsü asoshi tenzüktsüba purtem lir ta asenoki angateta ajungshitepdi. Ibaji mangatet tashi Nagaland anüdok o anülulen na tamajung akümtsü tokteper amai akümtsü.