Yashi aika süiogo, asüng aika arutsü, saka tanü yabo ka dang: Dr SC Jamir

Mokokchung, Dec. 16 (TYO): Yashi aika süiogo aser asüng aika arutsü anünga lir, saka tanü (today) yabo ka dang lir, anungji, tanü ya kecha meinyaki odang mesüidaktsüi Nagaland aser talisa Mokokchung atema tongtibang langkabo inyaktsüla, ta metetdaktsü.
Iba o ya Bodbarnü Odisha Angh Dr. S.C Jamir-i yangi Imkongmeren Sports Complex Mokokchung nung Mokokchung town küm 125 ajungba tenüngsang agütsüba sentong ka nung jembidang metetdaktsü.
Paisa ashiba agi, asen jakdang tayongzükba aika lir, aji oda, item tayongzükba rongnung tang rongdak nüngdakbaji yimjung lir. Meimchir inyakba maparen ajak nung yimjungji tongtibangtiba lir, ta metetdaktsü. “Yimjungji bendangeri bener marutsütsü saka asen mulungjang nungi adokdaktsüla,” ta paisa ayongzük.
Lokti ka tejakleni aotsü atemaji telungjem nüngdaker. Tenokdangbatem koktettsü asoshi ochiba nung lungjemtsüla, ta pai ashi. “Kodang asenok lungjema lidir tamajungren nungi koktettsü aser tejakleni aotsü asoshi tajungbaleni meraa aotsü aniokteter,” ta paisa shisem.
Kin indang jembiba ‘Tribalism’ ya indoktsüla aser linük ‘Nationalism’ anioktsüla. Iba wadang ya tamakoktsü maparen ka asütsüa akok kechiyong küm talangka tribalism ajanga nüburtem mesüa aruogo, saka tang yabo ‘nationalism’ amettsü/azüittsü mapang lir, ta paisa tayongzükba ka agütsü.
“Nükmerem, ashikülak, rongsen benbuba, meshimetsüba, azümesen yimya indoker pei sasa pei mang kokteta aotsü asoshi mapa meranga inyaktsüla aser mangdang akaba kin ka asütsü merangtsüla,” ta paisa ashi.
Paisa asen lanurtem dang tensa den apet alitsü indang ashidang, taoba benshia aruba nüngdak malibatem aser tetezü maliba tebilembatemji indoker tensa den apet inyaktettsüba mulungsentsü alitsü asoshi ayongzüka liasü.
“Yimten telatetba-ji tensa den apet jembitsüla, ibaji tarutsü küm 30-40 tashi nung lanurtemi agizüktettsü nükla yur jembitsüla”, aji oda, iba dak sentakba nung kanga süoki ia/kümdanga yanglutsü asoshi paisa inakdaktsünüba olen ka ashi.
Asen jakdang tayongzükba ajurubatemji education tajung agütsüba ajanga koktettsü, anungji, education nung temulung agütsütsü asoshi pai ashi. Iba atemaji tesayur aser reju tajungtiba nüngdaker. “Yimji yimjung, terenlok, tejakleni aoba lokti ka akümtsübaji education tajung agütsüba dak tuluka nendaka lir”, ta paisa shisem.
Yashi aika süiogo aser asüng aika anünga lir, saka tanü (today) yabo ka dang lir, anungji, ibaji “kecha meinyaki odang mesüidaktsüi Nagaland aser talisa Mokokchung atema tongtibang langkabo inyaktsüla”, ta paisa ayongzük.
“Yashi koma liasü, tanü kechi jenjang nung lir aser asüng koma aotsü ta asübaji kanga tongtibang, aji oda, tanü putui tarutsü atemaji langka inyaktsüla”, ta paisa shisem.
Dr. S.C Jamir nem Mokokchung town 125 ajungba nüngtem akhüm tetushi agüja nüngo tajung ka senpettsü. Iba nüngoji taoba Nagaland Chief Secretary Alemtemshi Jamir IAS (Retd) ket nungi agütsü. Kasa sentong nung K.Khekiye Sema IAS (Retd)-ia mapang tatsüka agia jembi. Ao Baptist Arogo Mungdang, Church & Mission Secretary Rev. Dr. Nuklu Longkumer ajanga tenüngsang agütsüba sarasadem.