Yazidi tsür anati 2016 Sakharov Prize agizükogo

France kübok Strasbourg yimti nung tentetba European Parliament ki kilung nung sentong tajung ka agia, European Parliament Tir, Martin Schulz (Abelen)-i Nadia Murad Baseee Taha (Tiyongtsü) aser Lamiya Aji Bashar (Achijilen) na nem 2016 Sakhrov Prize agütsüba noksa nung angur. (Strasbourg, December 13)

Strasbourg, December 13 (Agencies): Iraq nung alir Yazidi tamangba yimsü benshir rongnung densemer tetsür anati 2016 Sakharov Prize tanü, Mongolbar nü agizükogo.
Tetsübo kecha meli pei tebilemba aser tangatetba lemsateptsü atema European Union (EU)-i kümshi agütsüba Sakharov Prize agütsütsü atema Nadia Murad aser Lamiya Aji Bashar na shimba osang alima dang taküm, 2016 küm October ita sangotksüba sülen France kübok Strasbourg yimti nung sentong tajung ka tanü agia, tena nem sempetji agütsü.
Islamic State (IS) kiralongrartemi tashiyim agi pua yur külen teburtem peladaktsütsü atema alar ama yokshir Yazidi tsür nisung 7,000 rong nung Murad o Bashar na densema liasü.
Yazidi tamangba yimsü meshimeshia samatsütsü nükjidong nung IS teloki kasa mapang nung iba tamangba yimsü amanger nisung 5,000 shi tepsetba osang bushiteta lir.
Murad o Bashar na densemba Yazidi tsürtemji IS teloki Iraq northwestern tsütsü, Sinjar anasa tentetba yimtsüngtem nungi 2014 küm tashiyim agi pua anir ao saka Murad o Bashar nati IS ket nungi jenteta, tena taküm kümzükteta liasü.
Iba mapang nungi tenzüka, Murad o Bashar nati Yazidi nisungtem taküm kümzüktsü aser parnok taküm jenjang tajungba kümdaktsütsü osangtsüsang prokshia, pei taküm bendanga agüja inyaktsü tenzüka lir.
“Ni ola malir indang ola akümtsü lemteta, tasü ita nokdaker. Ozü nüburtemi ajuruba ama tarutsü mapang nung nübur shingaia majurutsüsa inyaktsü atema EU lenirtem ajungshir,” ta Bashar-i sempet agizükdang metetdaktsü.
“IS teloki par nükla anema inyakertem merenshia tepsetter,” ta shia, nisung tepseta aibelener IS züngsem ajunga alima temzüngi melaba ama merenshitsü tayongzükba olen ka Murad-ia lemsatepa liasü.
Laisa ashiba agi, IS teloki Yazidi nisung ajunga mamangertem ta züngshia, par nütsüng yongsük ajunga meshi meshia samatsütsü merangba kuli tejangja lir.
Tesüiba mapang Soviet Union anema nokdaker Soviet scientist, 1989 küm asüsang, Andrei Sakhrov nüngtem nung nübur aser meimchir temeten atema pei taküm bendanga agüja nokdaker nisungtem shima, EU-i Sakhrov Prize ya kümshi agüja arur.