Yeddyurappa-i Karnataka CM atema tenangzükba agiogo

Monupii/May 17, 2018 anepdang Bengaluru nung aliba Raj Bhavan nung arishi küm 75, BS Yeddyurappa-i Karnataka Chief Minister inyaktsü atema tenangzükba agiba noksa nung angur. 

Bengaluru (Karnataka), Monupii/May 17 (Agencies): BJP legislature party lenir, B.S. Yeddyurappa Karnataka Chief Minister inyaktsü atema tanü tenangzükba agiogo.
Tanep 9:00 ako nung Raj Bhavan, Bengaluru nung State Angh, Vajubhai Vala-i ketdangsüa pa nem office tenangzükba agidaktsü.
Arishi küm 75, B.S Yeddyurappa-i Kannada oshi nung tsüngrem aser aluyimertem tenüng nung CM inyaktsü asoshi tenangzükba agia liasü.
Tenangzükba agiba sentong nung Centre nungi BJP lenirtem aser state lenirtem densema liasü. Parnok rongnung Union Ministers- Prakash Javadekar, J.P. Nadda, D.V. Sadanda Gowda aser Ananth Kumar nunger den Karnataka nungi Lok Sabha MP ana- Prahlad Joshi aser Shobha Karandlaje na den tongti ketdangsertem kar dena liasü.
Yasüng Congress party aser Janata Dal-Secular (JD-S) nati BS Yeddyurappa tenangzükba agitsü aliba sentongji sota atatsü atema Supreme Court dang mepishia liasü ajisüaka SC nungi Judge asemi akümba bench-i magizük.
Ajisüaka SC bench-i maneni Rogonü (Hokolbar) anepdang 10:30 ako nung iba ken o maneni angadangtsü lemteta yuogo.
Justice A.K. Sikri-i aniba bench-isa Yeddyurappa-i Angh dangi züluba shidi meshiogo.
Yasüng Angh, Vala-i Yeddyurappa dang sorkar akumtsü atema jaokba den külemi anogo 15 tsüngda legislative assembly nung majority sayutsü tuyua liasü.
Tawa agiba Karnataka assembly election nung BJP-i menden 104 nung takok ngua single-largest party liasü, ajisüaka sorkar akumtsüsa menden 8 agi mabensa.
Ano külen Congress-i menden 78 aser Janata Dal-S (JD-S)-i menden 37 nung takok ngua parnok lokteper sorkar akumtsü atema jaoktsü asoshi Angh dang asüngdang, ajisüaka Angh-i sorkar akumtsü atema BJP dang jaok.
Yeddyurappa-i tang agi 8benbuba Shikaripura assembly menden nungi takok nguogo aser tang agi asembenbuba state Chief Minister inyaktsü atema tenangzükba agiogo.