Yeddyurappa maitsüba ajanga süngmanger: Congress Party

New Delhi, October 26 (Agencies): Bodhbarnü Congress-i, sübokrem agiba ken o nung Bengaluru nung aliba court kati taoba mapang Karnataka Chief Minister aser state BJP Tir, B.S. Yeddyurapppa maitsüba ajanga süngmanger, ta metetdaktsü.
“CBI nem kuli agütsübatem parnoki paidokba ajanga onok kanga süngmanger aser aoksar. Iba ya yimtenren aitba ajanga lir,” ta Congress lenir, Sanjay Jha-i osangbenertem dang ashi.
Congress-isa, NIA (National Investigation Agency) ya Narendra Modi indang bushisüngdangba agency ka kümogo, ta tai tongloktsü.
Jha-i, “Modi’er sorkar kübok CBI ya Convenient Bureau of Investigation kümogo, NIA (National Investigation Agency) ya Namo (Narendra Modi) Investigation Agency,” kümogo, ta aitsü.
Centre nung BJP-i aniba sorkar aija Congress leniri, “Tang tensa nung, bushisüngdangtsü aser kuli agütsütsü atema tentetba tentettemi pei mapa nung tamakok mejungi angur. Item ajak ya yimtenren tiyongi aitba ajanga lir ta kuli reprangteter,” ta ashi.
Jha-isa, Yeddyurappa-i shitakba tentendangbaji nüburtem indang court nung angutsü, aser ibaji election ajanga jungkai adoktsütsü, ta ashi.
Ano külen court-i obendang agütsüba agi temelung süa Bharatiya Janata Party (BJP)-i tenüngsang agütsüogo.
Osangbenertem dang BJP National Secretary, Shrikant Sharma-i, “Pa nem tai tongloktsüba ajak court-i maitsüi agienba atema onok pelar. Pa anema ken o benokbaji yimtenren ajanga lir ta tamalena onoki jembia aruogo,” ta ashi.