Yediyurappa-i Trust Vote takok angu: Ramesh-i Speaker mapa toktsü

Bengaluru, July 29 (Agencies): Karnataka nung anogo asem tain BJP sorkari tanü Assembly nung parnok nübo teimba lir ta sayutetogo.
Hombarnü assembly nung BS Yediyurappa-i aniba sorkari confidence motion nung takok angu.
Tanep senden tenzüker ghonda majungdang Yediyurappa-i trust vote nung takok anguba sülen Assembly Speaker KR Ramesh Kumar-i pa menden toktsü.
Yashi Karnataka Speaker Ramesh-i Congress MLA 11 aser JDS MLA 3 tashi 2023 nung assembly kümsük metembang tashi disqualify asü.
Iba ajanga assembly nung majority mark ji menden 105 ajema aküm aser ibaji BJP MLA 105 den kasa lir. BJP den Independent MLA katia yariteper.
Karnataka assembly nung Congress MLA 66, JDS 34, Speaker aser BSP nungi züngdokba MLA ka lir. July 23 nü trust vote agidang HD Kumaraswamy’er posemtsü tetuyuba agütsüba tashi mangaba atema BSP-i par MLA anentsü.
Tanep BJP sorkar metenba sülen Ramesh-i ita 14 tashi inyaka aruba sülen Speaker menden nungi anen.
“Ni iba office toktsütsü telemtetba agiogo” ta pai shia Deputy Speaker Krishna Reddy nem shidi agütsü.
“Ni kü mulungsentsü aser Constitution sülen anidaka mapa inyakogo. Ni kü tajungtiba agi Speaker ka ama inyakogo” ta Ramesh-i ashi.
Yediyurappa-i tanep confidence motion benokdang ni mang ayangba politics meinyaktsü ta ashi.
Amadoktsü aser tatok agütsüba tangatetba nung ni amanger. State nung sorkar ketdangsübaren mali kümogo aser ibaji ni tenzüktsü, ta paisa ashi.
“Ni chief minister inyakba ya nübortem indang taginüba lir” ta Yediyurappa-isa shisem.
Külen, Congress Legislature Party leader Siddaramaiah-i ashiba agi “Yediyurappa’er sorkar ya temzüngi memelar aser meshitak lir.”
Sorkar ya talangka maotsü ama bilemer aser nisungtemi na posema menungiter, ta Siddaramaiah-i Yediyurappa dang ashi.
“Nübortemi na posemba kong lir, nenok nübo teimba ta asübaji kong lir. Yediyurappa-i MLA 105 dang anir chief minister kümogo. Na kobika CM inyakdir repranga atadi. Ni na kümsük tembanga CM inyakdaktsünür saka kümsük metembangtsü ama bilemer” ta Siddaramaiah-isa ashi.
Yediyurappa-i sorkar ketdangsübaren mali ta asüba olen atema JDS lennir Kumaraswamy-i ashishitep.
“Na komaser tashi angu’ar ni mejembitsü, saka tasa atonga inyakba ajanga nai iba tashi angu” ta Kumaraswamy-i Yediyurappa dang ashi.
“Nai tasa atonga iba tashi angu, tang atema danga nai democracy kümzükang” ta paisa Yediyurappa dang ashi aser sorkar ketdangsübaren malia ta asüba kulitem agüjang ta asüngdang.
“Ozü telokibo BJP sorkar loksa odaktsütsü atema mapa meinyaktsü. BJP-i ozüng alema mapa inyakba ajanga sorkar akümtsü tashi angu anungji JDS-i confidence motion magizüker” ta Kumaraswamy-isa metetdaktsü.
Hombarnü temulung masüba Congress MLA ana- Ramesh L Jharkhiholi aser Mahesh Kumathalli nati Supreme Court nung parnok Karnataka Assembly nung MLA nungi anentsüba anema ken o ka benokogo.
K R Ramesh Kumar-i July 25 nü disqualification asüba tetuyuba agütsüba agienjang ta tenati ken o benokba nung shia lir.