Yemen Houthi mosque nung 25 shi pokset

Sanaa, September 24 (Agencies): Peisasa pokseta asütsü mulungteter anati Yemen yimtiba, Sanaa kübok mosque ka nung bomb lendong 2 tashi tanü Brehostibar nü atalokdaktsü ta police-i metetdaktsü.
Tanü atalokdakba bomb lendong nung par Muslim Eid a-Adha sarasadem mapang agia alir nisung 25 shi poksetba osang jangjaogo ta parnoki ashi.
“Tanü lendong nung ishiba agi nisung 25 poksetba aser ano nisung 36 shi yiruba osang tang tashi nung jangjaogo,” ta parnoki osang jangjashitsü.
Sorkar anemer Houthi teloki tentetba al-Balili mosque nung tanü bomb lendong anaji par züngsemtemi atalokdaktsü ta shia, Yemen nung tentetba Islamic State (IS) teloki tanü lendong atalokdaktsüba atema tenüng agia metetdaktsüogo.
Yemen Tir, Abd-Rabbu Mansour Hadi-i aniba sorkari Houthi telok den sentakba timtem tulu ajurushiba den külemi, IS aser al Qaeda in the Arabian Peninsula telok na den sentakba khureta benokba osang bushiteta lir.
Iran linüki pusemba Houthi teloki Sanaa yimti tashiyim agi küm 1 tejaklen agiba ajanga Tir, Hadi-i kidangsüa aliba Saudi Arabia linük nung jenoka alitsüsa aküm.
Ajisüaka, Hadi nem Yemen Tir menden maneni bendaktsütsü nükjidong nung Saudi-i aniba teloktep Arab mitkartemi par tayimtsü amshia Houthi telok anema taküm March ita nungi tenzüka kanga sashia raraba osanga jangjaogo.
Yemen sorkar aser Houthi telok na tsüngda tongpang kanga sashia raratsü tenzükba ajanga tanü tashi nung Yemen nung alir nisung 4500 dak tema asüba osanga bushiteta lir.
Ano külen, teloktep Arab mitkartemi pusemba Yemen sorkar mitkartemi Houthi telok takok ngua makdoktsü tenzükba sülen Saudi kübok Riyadh nung taoba ita 6 tashi jenoka lir külen, Tir Hadi-i Aden yimti tan Mongolbar nü tanaben tonga aoba osanga jangjaogo.