Yemen military parade nung Houthi nungeri amak; nisung 32 asü

Aden, Luroi/August 01 (Agencies): Yemen nung Iran den sendaktepa aliba Houthi movement ajanga ashiba agi, parnoki Brehostibarnü Aden nung military parade ka nung missile aser drone amshia amak, kong nisung 30 dak tali asü. Aden ya Saudi-i busemba sorkar kübok lir.
United Arab Emirates temi yariba Saudi-i anir teloktep mitkartemi Houthis den raraba Yemeni Security Belt sepaitem indang military camp ka nung bomb tesashi apokba sülen osangbener temi ali nung tasümang teku angu. Yemeni Security Belt sepaitem ya United Arab Emirates temi yarir.
Iba lendong nung sepai tanishir ka dena nisung tajemba agi 32 tepset, ta medical aser security osang ajanga ashi.
Sepaitemi ola adoka yirur alirtem anir oa truck nung yutsü aser ali nung korang temeremtem azü agi melangbanger liasü.
Bomb ka apokba sülen Medecins Sans Frontieres ajanga Twitter nung yirur alir nisung ter Aden nung aliba mozüki nung anepaludar, ta sangdonga liasü, saka mapang tatsüka lir item yirur alir ya south tsütsü rong anenba yimti nung aliba police station ka nungi lir ta sangdonga liasü. Yangji nisung ter asü aser 16 yiru, ta parnoki ashi.
Houthi nunger indang Al Masirah TV ajanga ashiba agi, par teloki medium-range ballistic missile ka aser armed drone ka parade alidaki yok, aser item ya parnok kübok aliba province temi mitkartem yoktsü renemshiba sentong ka liasü.
Police station ka amakba indang parnoki mashi, saka security osang ka ajanga ashiba agi, iba lendong nung tapoktsü oset aketba gari ka dena liasü. Lendong ana ya sendaktepa ali asü maliar mejangjateti lir, saka taoba mapang nunga Islamist telungpur al-Qaeda teloki gari amshia lendong agüja arua lir.
Military parade nung asüsang sepai tanishir ya Brigadier General Muneer al-Yafee lir ta sorkar busemba sepaitem aser security osang ajanga ashi.
“Buraiqua district kübok Aden nung aliba Al Jalaa military camp nung sentong agiba mapang nüburtem nokdaka aliba tesülen bomb ya apok. Tanishir ka südi ta temulung melemi aliba tasümang ka anasa sepaitem jepteba liasü,” ta osangbener temi ashi.
Yafee ya sabang nungi tesemdanger ka ajurui aluba mapang bomb ya apok.
Anüolen linüktemi yariba Sunni Muslim coalition koba Saudi Arabia aser UAE nati anir lir, parnoki linük yimtiba Sanaa nung linük balalai agizükteta aliba sorkar amenoktsütsü asoshi 2015 küm nungi Yemen nung rarar. Iba sorkar ya Houthis temi 2014 küm tatemlen atsüngdoka liasü.
Abdu-Rabbu Mansour Hadi’er sorkari south tsütsü rong anenba yimti, Aden nung yimsü asür. Houthi movement, shirnoki ochimashi anema nokdaker ta ashir, parnok telok kübok Sanaa aser Arabian Peninsula linük nung yimti tulutem timba lir.
Iba parade ya Taiz aser Dalea-i aotsü renemshiba sentong ka liasü, ta Houthi military odongtar kati ashi.
Iba lendong asoshi Yemen sorkar mesüra teloktep sepaitem nungi osang kecha sangdonga mali.
Taoba ita UAE-i Yemen nung par sepaitem ajemdaktsür ta shia Aden aser Hodeidah yimti nungi Houthis den raratsü yoka aliba sepai kar anizüker ao. Rong anenba Hodeidah yimti nung UN-i December ita nungi yimjung benoka lir.
Emirati ketdangser kati ashiba agi, Yemen nungi UAE sepai ajungabo anizüker maotsü, kong parnoki Yemen sepai 90,000 nem training agüja lir.
Houthis temi arrtsü alema missile aser drone amshia Saudi yimti nung lendong agütsür aser coalition ajanga Houthi mitkartem aliba tesemtem aser talisa Sanaa temeket nung tayimtsü amshia amaker.
Houthis temi long-range ballistic missile ka Saudi Arabia indang Eastern Province kübok Dammam nung Brehostibarnü khaloktsü, ta Al Masirah TV ajanga ashi. Saka coalition mesüra Saudi ketdangsertem nungi telangzüba kecha agüja mali.
Küm pezü dak tali Saudi Arabia aser Iran tsüngta ‘proxy war’ raraba ajanga nisung meyirijang ter dak tali tepsetogo aser Yemen nung ayawara arutsü ana nung lir.