Yemen mitkartemi Al-Anad tayimtsü tesep tanaben agir

Aden, August 04 (Agencies): Yemen sorkar mitkartemi Yemen nung tentetba mitkar tayimtsü tesep tulutiba tanü Mongolbar nü tanaben agiba osang jangjaogo.
Saudi Arabia-i aniba teloktep Arab mitkartem nungi teyari agia, Yemen sorkar mitkartemi Al-Anad airbase-ji sorkar amenba Houthi telok nungi tanaben agiogo.
Tzüyimkümlen tentetba Aden yimti taoba July ita agiba sülen Yemen mitkartemi tanü tanabuba tongti yimti tanaben agishir lir.
Teloktep Arab mitkartemi par tayimtsü amshia yariba den külemi, Gulf Arab mitkar noklang aika yoka Yemen mitkartem den yaritepa Houthi telok den ghonda 24 shi tongpang kanga sashia raraba sülen parnoki Al-Anad tesepji agiba osang jangjaogo.
“Ozü lenisang, Abedrabbo Mansour Hadi tanaben Yemen Tir menden nung memendaktsü tashi ozü mitkartemi Houthi telok den tanen maka tongpang raratsü renema lir,” ta Yemen defence ministry-i tanü metetdaktsü.
Aden yimti nungi anüdoklentip tsütsüleni kilometer 60 shi pilar tentetba Al-Anad tesep ya Taez yimti aser Houthi teloki agia aliba Sanaa yimtiba tsütsüleni aoba tongi lenmang nung tentetba tongti tesep ka lir.
Houthi teloki tashiyim agi taküm March ita agiba jakdang US mitkartemi par drone tayimtsü amshia Al-Qaeda telungpur den raratsü asoshi Al-Anad tesep ya amshiba osanga bushiteta lir.
Yemen mitkartemi Al-Anad tesep takok ngua tanaben agiba ya Abdulmalik al-Houthi aser pai aniba Houthi telok asoshi takoksa tulu ajurur lir.
Yemen mitkartemi Al-Anad tesep agiba sülena iba tesep nungi anüdoklentip tsütsüleni kilometer 10 shi pilar Houthi teloki agia aliba Labouza mitkar tesepa tanü amakba osang jangjaogo.
Tanü Al-Anad tesep agitsü asoshi raraba tongpang nung Houthi züngsem 70 shi tepsetba aser parnok 10 shi taküm lia apuba osang ka mitkar lenirtemi metetdaktsüogo.
“Tanü tongpang nung mitkar züngsema 24 tashi asüba aser parnok 23 shi yiruba osang tang tashi nung jangjaogo,” ta parnoki ashi.
Mitkartemi Aden yimti agishiba sülen tanü Al-Anad tesep agiba ajanga taküm March ita nungi tenzüka Saudi Arabia nung jenoka alisang, Tir Hadi-i Yemen anülulentip tsütsü densemba tesemtem madak tanaben yimsü asütsüsua lenmang lapoker asütsü akok ta mongintemia metetdaktsüogo.