Yemen nüburtemi meshitetba timtem toushi ajurur: Joanne Liu

Riyadh, July 30 (Agencies): Saudi Arabia-i aniba teloktep mitkartemi nungdakba chiyongtsü aser mozü mora metongtsütettsüa Yemen nokdangba yong Yemen nüburtemi tebang agi meshitetba timtem toushi jenti ajurutsü tenzüka lir ta nüburtem nem teyari agütsüba Doctors Without Borders (DWB) telok lenila, Joanne Liu-i tanü Brehostibar nü metetdaktsüogo.

Liu-i tanü Sanaa yimtiba tonga orr Yemen sorkar anemer telok, Houthi-i agia aliba tesemtem semdanga senzüba sülen osangbener den ajurutepdang Yemen nüburtemi timtem toushi jenti ajurushiba osangji lemsatepa liasü.

“Tang shiranga alirtemi nungdakba mozü mora metongtsütettsüsa tenokdangbaren benokba ajanga nüburtemi tebang agi meshitetba timtem toushi jenti ajurutsü tenzüka lir,” ta lai ashi.

Saudi-i aniba teloktep Arab mitkartemi taoba ita 4 tejaklen nungi tenzüka par tayimtsütem amshia Houthi teloki tentetba tesep balala kanga sashia amakba osang bushiteta lir.

Yemen sorkartemi Houthi telok Aden yimti nungi makdokba sülen nungdakba chiyongtsü aser mozü mora abenba United Nations (UN) rong kati Yemen anülulentip tsütsü tzüyimkümlen tentetba Aden yimti tonga ao saka rongi abenba teyari osettsüsetji Yemen nüburtem teperi masüba osang jangjaogo.