Yemen nung ghonda 48 atema yimjung alir

Yemen southwest tsütsü, Taiz yimti nung alimai agizükba Yemen Tir, Abd-Rabbu Mansour Hadi pusemertemi Houthi sorkar anemer telok den tongpang raradang yirur ka mozüki tonga anir aoba noksa nung angur. (Taiz, November 19)

Sanaa, November 19 (Agencies): Tanü, Honibar nü nungi tenzüka, Yemen nung taruba ghonda 48 tashi yimjung alitsü renemba osang ka Saudi Arabia linüki metetdaktsüogo.
Yemen nung tongpang raraba ajanga nüburtemi pei talidak melitettsüsa küma, tanga tesemtem nung jenokbaren ajemtsütsü aser timtem toushi jenti ajurua alir nüburtem nem nungdakba chiyongtsü aser mozü mora agütsüdaktsütsü nükjidong nung tan yimjung mapangji agiba osang angazükogo.
Gulf lima tentetba Saudi linüki par mitkartem yoka, 2015 küm March ita nungi tenzüka, taoba Yemen Tir, Ali Abdullah Saleh aser pa pusemer Houthi sokar anemertem den tongpang raratsü tenzüka lir.
Houthi teloki tashiyim agi Yemen Tir, Abd-Rabbu Mansour Hadi Tir menden nungi 2014 küm atsüngtoktsü merang aser Mansour nem tetsükdaktsü kecha majurui tanaben yimsüsütsü menden bendaktsütsü nükjidong nung Saudi sorkari Hadi aser par miktartem pusema nungitba osang bushiteta lir.
Yemen nung tongpang tanaben makai kanga sashia raraba ajanga nisung 10,000 dak tema asüba aser nisung meyirijang jenti tanü chiyongtsü mongui timatemba den nungdakba mozü mora monguteti aliba osang ka United Nations (UN)-ia metetdaktsüogo.
Tan yimjung mapangji tanü 12:00 anüngdang nungi tenzüka agitsü renema lir aser Iran linüki pusemba Houthi teloki nangzükba ama inyaka, par teloki amokbangba tesemtem nung alir nüburtem nem nungdakba teyari aser chiyongtsü agütsütsü maparen menokdangra, yimjung mapangji talangba küma atsünglangtsü renema lir.
Houthi telokia tongpang rarabaren anena, teloktep sorkar tasen tentettsü mapatong nung shilem agia densemtsü mulungba olen ka tan Bodbar nü metetdaktsüogo.
“Yemen nüburtemi pei temeten amshia, pei linük kümzüktsü atema tongpang teraradak lir aser Saudi Arabia-i kodang tongpang rarabaren anendir, idangji Yemen nung tongpang rarabaren anentsü,” ta Houthi telok lenir, Mohammed al-Bukhaiti-ia tanü metetdakja liasü.
Sanaa yimtiba toktsür, par tzüyimkümlen tentetba Aden yimti nung tesepti tentetba Hadi’er sorkaria Houthi teloki lungbanga aliba Taiz yimti nung alir nübur meyirijang jenti nem nungdakba teyari aser mozü mora agütsütsü temepishiba olen benokba osanga jangjaogo.
US Secretary of State, John Kerry-i ayonger külen tan yimjung sentongji agiba osang angazükogo.