Yemen nung ghonda 72 tashi yimjung mapang alitsü: Ahmed

London, October 18 (Agencies): Yemen ajunga nung tongpang rarartemi tan Bodbar aonung nungi tenzüka, par tongpang rarabaren anena, ghonda 72 tashi yimjung mapang lidaktsütsü nangzükba osang ka United Nations (UN)’er Yemen Special Envoy, Ismail Ould Cheikh Ahmed-i tanü, Mongolbar nü sangoktsüogo.
“Tan Bodbar aonung 8:59 ako nungi tenzüka, Yemen nung tongpang rarabaren ajunga anentsü renemogo aser yimjung mapangji anogo 3 tashi tendanga agidangba sülen kasaji nungdakra, talangba küma atsülangshitsütsü akok,” ta pai osang jangjashitsü.
“DCC (De-escalation and Coordination Committee)-i ketdangsüa, Yemen nung tongpang rarartemi par tongpang rarabaren anentsü nangzükra, Yemen nung ghonda 72 tashi yimjung mapang lidaktsütsü aser ajaki mulungra, yimjung mapangji maneni talangba küma atsülangshitsütsü onük ozü Tir, Abd-Rabbu Mansour Hadi-i agizükogo,” ta Yemen Foreign Minister, Abdulmalik al-Mekhlafi-ia tan Hombar nü metetdakja liasü.
DCC ya UN-i nungita, mitkar telok rong nungi Yemen nung agiba yimjung tezüngzüktep ajunga ketdangsüa ajishimtsü atema tentetba tongti tentet lir.
Yemen nung küm 2 tejaklen nungi tenzüka tongpang kanga sashia rarartemi par tongpang rarabaren anena, tekaratiba mapang nung yimjung tezüngzüktep agitsü asoshi Ahmed densema, US aser Britain nati ajungshiba sülen tan yimjung mapangji agitsü renemer lir.
Tan yimjung mapang benokba jakdang Ahmed-i Yemen sorkar anema nokdaker Houthi telok lenisang aser Yemen Tir, Hadi na dena ajurutepba osang angazükogo.
Saudi Arabia-i aniba teloktep Arab mitkar teloki pusema nungiter, Hadi aser pai aniba sorkari Yemen tzüyimkümlen, Aden nung par tesepti tenteta lir aser Iran linüki pusema nungiter, taoba Yemen Tir, Ali Abdullah Saleh aser pai aniba Houthi teloki Sanaa nung par tesepti tenteta lir.