Yemen nung saktsüpokshi wara tesashi lir: UN

New York, June 25 (Agencies): Alima nung saktsüpokshi wara tamajungtiba Yemen nung lir aser iba wara ajanga nisung 1,310 asütsü jenjang nung lir, ta World Health Organization (WHO) ajanga ashi. Yemen nung iba saktsüpokshi wara ya April nung tenzük.
Arabian Peninsula nung aliba Yemen linük nung iba saktsüpokshi wara agi shiranger südi, ta temolung malemba nisung 200,000 lir aser August ita tatemlen tashi nung iba wara agi nisung 300,000 dak kongshitsü südi, ta WHO indang director general, Margaret Chan-i Honibarnü sangdong ka nung ashi.
“Ita ana tsüngta nung iba saktsüpokshi wara ya linük nung tesem ajunga sünga prokshi,” ta Chan aser UNICEF executive director, Anthony Lake nati ashi.
“Iba linük nung saktsüpokshi ajanga nisung 1,300 süogo – item rongnungi shilem 25 bo tanurtem lir – aser anu timba akümtsü südi,” ta Chan-i shisem.
Saktsüpokshi wara ya kanga kera menatepa aor aser timba chiyongtsü aser tzü tamajung nungi adokdaktsür. Iba wara anepalu mesüra ghonda ka tsüngta nung lendongi aier.
Iba wara ya anepalutsü temela, saka Yemen ya rara aser azüdokshi agi sünger asünung iba wara anepalutsü kanga tasak lir.
Yemen nung kin balala aser linük balala yaritepa raraba ajanga iba wara ya tali mela prokshidaktsü aser iba wara ya nisungi yangluba lir, ta UN-i aitsür.
Yemen nung Houthi mitkar temi yimsü asüba anendaktsütsü aser UN-i meteta aliba sorkar busema Saudi Arabia aser iba linük den sendaktepa aliba linük temi 2015 küm nungi tayimtsü amshia Yemen nung rara arur.
Küm ana raraba mapang iba linük nung nisung 10,000 dak tali tepset, nisung 45,000 dak tali yiru aser iba linük nung nütsüng million 26 aliba nungi shilem 11 tesem balala-i prokshi.
Iba saktsüpokshi wara aliba ajanga Oxfam teloki linük nung yimjung alitsü asoshi Hokulbarnü sangdong, saka temelenshi kicha mangur.
Yemen yimtiba, Sanaa nung aliba Sabeen mozükidangi minute shia iba wara agi shiranger ana mesüra asem arur, ta mozüki nung ketdangser temi ashir.
Yemen nung iba saktsüpokshi wara nokdangtsü asoshi Saudi Arabia indang Crown Prince, Mohammed bin Salman-i WHO aser UNICEF nem sen million $66.7 tenla agütsütsü, ta Saudi Arabia indang Ministry of Culture & Information ajanga Honibarnü sangdong.