Yemen nung tai maketba nisung 1,600 dak tema süogo: UN

Berlin, July 14 (Agencies): Taoba anogo 10 tsüngda nisung 142 shi asüba densema Yemen nung mangatettep adoka tongpang kanga sashia raraba ajanga tai maketba nisung 1,600 dak tema ita asem shi nung asüba osang bushitetogo ta United Nations (UN)-i tanü Mongolbar nü sangoktsüogo.

UN teloki ayonger külen Yemen sorkar aser sorkar anemba Houthi telok na tsüngda yimjung nung alitsü tezüngzüktep agiaka, Yemen sorkar pusemba bendang linüktemi par mitkar tayimtsütem amshia Yemen nung tanen makai amakba sentong balala agiba osang bushiteta lir.

Ano, Yemen sorkar mitkar aser Houthi telok na tsüngda Yemen tesem balala nung tongpang kanga sashia raraba osanga bushiteta lir.

UN Human Rights Office otongdar, Rupert Colville-i ashiba agi, “Tan July ita 3 nü nungi tenzüka taoba anogo 10 tsüngda nung tai maketba nübur ishiba agi nisung 142 shi Yemen nung tepsetba aser nisung 224 shi yiruba osang tanü tashi nung jangjaogo.”

Tan nisung 142 tepsetbaji densema taküm March ita 26 nü nungi tenzüka tanü tashi nung tai maketba nübur 1,670 tepsetba aser nisung 3,829 shi yirutsüba osang tang tashi nung bushiteta lir ta pai ashi.