Yemen nung tongpang raraba ajanga 200 shi tepset

Saudi Arabia-i aniba teloktep Arab mitkartemi par tayimtsütem amshia Sanaa yimtiba amakba sülen Yemen sorkar anemer telok, Houthi pusemba mitkar commander ka, Brigadier Khaled al-Anduli’er ki kanga mejungi poksar aliba noksa nung angur. (Sanaa, July 07)

Sanaa, July 07 (Agencies): Saudi Arabia-i aniba teloktep Arab mitkartemi par tayimtsü amshia Yemen nung amakba maparen inyakba aser Yemen nung raratepa aliba telok ana tsüngda tongpang kanga sashia raraba ajanga yashi, Hombar nü kisüng nung ishiba agi nisung 176 shi asüba osang bushitetogo ta Yemen sorkar ketdangser kati tanü Mongolbar nü metetdaktsüogo.

Taküm March ita 26 nü nungi tenzüka Yemen nung taoba mapang nungi tesashiba küma tongpang raraba aser Saudi-i aniba teloktep mitkartemia par tayimtsü amshia amakbaren anentsü asoshi United Nations (UN)-i ajungshia aruba osanga jangjaogo.

Teloktep Arab mitkaremi Yemen sorkar anemer telok, Houthi nokdangtsü nükjidong nung par amakba maparen tenzüker tanü tashi nung nisung 3000 dak tema Yemen nung tepsetba osang bushiteta lir.

Teloktep Arab mitkartemi par tayimtsü amshia bomb-tem tsükdakja Yemen anüdoklentip tsütsü Amran province amakdang shishilembadak alir nisung 30 densema ishiba agi nisung 63 shi yashi tepsetba osang jangjaogo ta Houthi teloki ketdang asüba Saba osangi metetdaktsü.

Kasa province nung Houthi teloki tentetba checkpoint ka nung Yemen sorkar pusemer aser Houthi telok na tsüngda tongpang raraba ajanga ishiba agi nisung 20 shi tepsetba osanga jangjaogo ta ketdangsertemi ashi.

Yemen anülulentip tsütsü al-Foyoush jila nunga teloktep Arab mitkartemi nisüng 60 shi yashi tepsetba osang bushitetogo.

Aden aser Lahj yimti na tsüngda nung Houthi teloki tentetba checkpoint ka nunga tongpang raraba ajanga Houthi züngsem 10 shi densema ishiba agi nisung 30 shi yashi asü ta ketdangsertemi metetdaktsü.

Tang Saudi Arabia nung jenoka alisang, Yemen Tir, Abd-Rabbu Mansour Hadi pusemer o Houthi telok na tsüngda Yemen tiyongtsülen, Mariba province nunga yashi tongpang raraba sülen Houthi telok aser Yemen sorkar na meyokteper ajak agi nisung 20 tashi asüba osang jangjaogo.

Ano külen, Hadi-i aniba Yemen sorkar aser Houthi telok na tsüngda tongpang raraba anena par telok anati yimjung nung alitsü tezüngzüktep agitsü asoshi Yemen-i yokba UN ambassador, Ismail Ould Cheikh Ahmed-i Sanaa nung alir Houthi ketdangsertem den tanüa ajurutepba osang jangjaogo.