Yemen nunger asetkong nung UAE-i sepai yoker

Cairo, Monupii 05 (Agencies) : Yemen kübok aliba asetkong ka nung UAE-i par sepaitem yokba ajanga linük ana tsüngda tesendaktep raksatsü akok ta temulung malem bilemdar.
Iba asetkongji UNESCO-i ‘world heritage site’ ka ama agizükogo saka Yemen sorkar den asüngdangya mesüi parnoki sepaitem yok, ta tanü Küptoknü Yemen nungi official kati mepelai metetdaktsü.
Saudi-i anir aliba coalition purtemi Yemen anüdoklentip tsütsü Houthi tepungpurtem den raraba nung UAE ya tongtibang tongshi ka ama liasü.
Aji oda süaka, Emiratis (UAE) purtemi taoba küm ana tsüngda Yemen anüolentip tsütsü tesem telungzük ka mekazüktsü meranga tepuokdak yanglur aser nüburtem rongnungi shimteta sepaitem nem agütsüba amala training agütsür.
“Emiratis-i Yemen nung tetsüng ajemoka inyakba anendaktsütsü atema sorkari United Nations nem takhangba shiti ka agütsütsü bilemdar,” ta Associated Press den jembidang ketdangser jagisa metetdaktsü.
Taoba anogo ishika tsüngda Socotra asetkong nung UAE-i sepai 330 shi den tanks aser prangpong tulu yoka lir.