Yemen police aser al-Qaeda na rarardang nisung 19 süogo

Aden, March 13 (Agencies) : Khen tatsüka asoshi sorkar security tesem amai mesemer aliba Aden, Yemen nung police aser telungpur na ana nü raraba mapang al-Qaeda züngsem asütsü ta temulung melemi bilemba nisung parnok 17 den police 2 süogo, ta security osang ka ajanga ashi.
Jihad atema rarartem kanga shashia aliba tesem, central Mansura district nung aonung ka süngjema aliba sülen ano tanü, Deobarnüa rara tenzükogo.
Saudi Arabia-i aniba telok indang raradang amshiba tayimtsütem aser Apache helicopter temi police pusema anüng nungi amak, ta kasa osang ajanga ashi.
“Yashi nungi tang tashi nung tajemba agi al-Qaeda telok nungi parnoki züngsem 17 tashi taküm samatsüogo aser iba lendong nung tia makai police-a ana asü,” ta security ketdanger kati AFP osangbenertem dang ashidang, paisa, jihad atema rarar timbaka anüng nungi amakdang asü, ta shisem.
Tejak semoktsü agi sembanger parnok aikati iba tesemi police maitdaktsütsü asoshi al-Qaeda wako amer nokdangtsü merang, ta tenük kuli angur kati yashi, Honibarnü ashi.
Police-i, Mansura nüburtem kümzüka ayutsü mechi onoki item telungpur den raraba manentsü, ta sangdong ka ajanga metetdaktsüogo.
Al-Qaeda aser Islamic State telungpurtemi Iran-i nungitba Huthi telungpur aser sorkar na raraba maongka agia Aden nung parnok züngsemtem nungoka yoker.
2015 nungi tenzüka anüng nungi amakdang, Shiite aser parnoki aniba telok nisnung 6,100 taküm lalutsüogo aser tasür rongnung tesadang ka shibo public lir, ta UN-i asadangtetogo.