Yemen yimjung senden April ita amentsü: Ahmed

United Nations, March 24 (Agencies): Yemen nung mangatettep adoka aliba teloktemi par mangatettepbaren bentettsü nükjidong nung yimjung senden tasen ka taruba April ita amentsü renemba osang ka UN Special Envoy, Ismail Ould Cheikh Ahmed-i metetdaktsüogo.

Taruba April ita 10 ayaterem nungi tenzüka mangatettep adokba teloktem rong nung tongpang rarabaren anentsü aser mangatettep adokertemi tsüngdong ajurutpa April ita 18 nü nungi tenzüka, Kuwait nung yimjung sendenji amentsü renemogo.

“Parnok rong nung adokba mangatettepbaren agientsü aser ajaki shilem agia yimtenren tebentetbaren bener arutsü nükjidong nung Yemen nung mangatettep adoka alir teloktemi tan yimjung senden tasen menshitsü renemogo,” ta Ahmed-i osang jangjashitsü.

United Nations Security Council (UNSC)-i agiba yimtenren tebentetbaren bener aruba ajanga Yemen nung adokba mangatettepbaren agientsü telemtetba nung ajemdaker, Yemen nung mangatettep adokba teloktemi tan yimjung sendenji amentsü renemer lir.

Iran-i pusema nungitba Yemen sorkar anemer telok, Shiite Houthi-i tashiyim agi Sanaa yimtiba 2014 küm September ita agiba sülen Yemen Tir, Abd Rabbu Mansour Hadi-i Sanaa toktsür Saudi Arabia kübok Riyadh nung jenoka alitsüsa aküm.

Ano, Hadi pusemer, Saudi-i aniba teloktep Arab linük mitkartemi yaküm March ita nungi tenzüka Yemen nung amaktsü maparen inyakba sülen tanü tashi nung nisung 6,000 dak tema asüba osang bsuhitetogo.

Yemen nung mangatettep adoka tongpang raratsü tenzüker tanü tashi nung Yemen nunger nisung million 2 dak temai par Yemen toktsütsüsa akümba aser nisung million 21 dak temai tang teyari nungdaka aliba osang bushiteta lir.

Yemen nung timtem toushi tia ajurua alirtem yaritsü asoshi dollar sen billion 1.8 tashi nungdaka akümba osang ka United Nations-ia tan March ita tetenzüklen alima dang sangoktsüogo.