Yemen yimjung senden nung shilem agitsü mulunger: Opposition

Yemen sorkar anemer Houthi telok züngsemtemi gari nung mener Sanaa yimti yimdongsüa senzüdang agiba noksa ka yangi angur. (Sanaa, April 20)

 Sanaa, April 20 (Agencies): Yemen nung tentetba Houthi sorkar anemer telok aser par telok pusemer teloktemi Kuwait nung amentsü ayongba yimjung senden nung shilem agitsü mulungba olen ka tanü, Bodbar nü metetdaktsüogo.

Yemen nung tongpang rarabaren anenja, par linük nung tensa tajungba kümdaktsütsü nükjidong nung United Nations (UN)-i Kuwait nung yimjung senden amentsü asoshi ayonga lir.

Houthi telok aser par telok pusemer, taoba Yemen Tir, Ali Abdullah Saleh-i aniba telok nungi ketdangsertemi Kuwait tanü mesüra asüng, Brehostibar nü tonga aotsü renemba osanga metetdaktsüogo.

UN-isa ayonger külen, tan Hombar nütu yimjung senden amentsü sentong renem saka iba senden nung adentsü asoshi Yemen sorkar teloki dang mulungba yong kasaji thinentsü lemtetshia liasü.

“Yemen sorkari sorkar anemertem yimjung senden amentsü mulungba atema kanga pelar. Ano, sorkar anemer Houthi telokia tan maongka ya agia, Yemen nung teti asoshi yimjung lidaktsütsü mera agitsü ajungshir,” ta Yemen-i yokba UN’er envoy, Ismail Ould Cheikh-i metetdaktsü.

“Yemen yimjung senden nung shilem agir ajungai kati ka dak temulung lemtepa mangatettepbaren ajunga bentetsü ajungshir,” ta UN Secretary General, Ban Ki-moon-ia metetdaktsüogo.

Houthi teloki Yemen yimtiba, Sanaa tashiyim agi 2014 küm September ita agiba sülen yaküm, 2015 küm March ita tashi nung Yemen anülulentip tsütsülen, Aden yimti tonga aoba yong alimai agizükba Yemen Tir, Abdu Rabu Mansour Hadi-i Saudi Arabia nung jenoktsüsa tia ajurua liasü.

Yemen nung mangatettep adoka tongpang raraba ajanga tanü tashi nung nisung 6,400 dak tema tepsetba osang bushitetogo.