Yemen yimjung senden tanaben amentsü: UN

Geneva, September 11 (Agencies): Yemen-i ajurua aliba mangatettep ken o adoka tongpang kanga sashia rarabaren anenja par linük nung yimji yimjung tia bener arutsütsü nükjidong nung yimjung senden tanaben taruba hopta amentsü ayongba osang ka United Nations (UN)-i tanü Hokolbar nü metetdaktsüogo.

“Yemen Tir, Abd Rabbuh Mansur Hadi-i aniba sorkar telok aser taoba Yemen Tir, Ali Abdullah Salen sülen anidakba Houthi telok napronglai tan ayongba yimjung senden nung shilem agitsü renema lir,” ta UN’er Special envoy, Ismail Ould Cheikh Ahmed-i osang jangjashitsü.

Ajisüaka, iba yimjung senden amendak aser anogoji tatem küma latetba sülen ang kasaji tarutsü anogotem nung metetdaktsütsü ta pai ashi.

Ano külen, Tir Hadi nem Yemen yimsüsütsü tashi tanaben agütsüshitsü nükjidong nung Saudi Arabia-i aniba teloktep Arab mitkartemi par tayimtsü amshia Houthi telok teseptem taküm March ita nungi tenzüka amakba ajanga Yemen nüburtem nem lendong aser timtem toushi tulu bener aruja aliba osang bushiteta lir.

Arab lima tentetba linüktem rong nung sensatiba, Yemen nung mangatettep adoka tongpang raratsü tenzüker tanü tashi nung nisung 4000 dak tema asüba den külemi, par linük nung ayawara arutsüsa tang tensa aliba osanga bushitetogo.