Yemen yimjung tezüngzüktep raksaba atema tebilemtsü akar: Ahmed

Geneva, December 19 (Agencies): Yemen yimjung tezüngzüktep raksaba atema tebilemtsü khuret benokba olen ka United Nations (UN)’er Special Yemen ambassador, Ismail Ould Cheikh Ahmed-i tanü Honibar nü metetdaktsüogo.

“Yemen nung agiba yimjung tezüngzüktep raksaba atema tebilemtsü akar. Ajisüaka, tan Geneva nung temendak Yemen yimjung senden maneni amentsü,” ta pai ashi.

Geneva nung ayonga amenba yimjung senden takok ngudaktsütsü nükjidong nung tan Mongolbar nü nungi tenzüka Yemen nung mangatettep adokba teloktem rong nung tongpang merarai yimjung nung alitsü tezüngzüktep agia lir.

Ajisüaka, Yemen sorkar mitkartemi par mitkar tashi amshia, sorkar anemer ket nung jila ana tashi yimjung tezüngzüktep agiba sülen agiba osang jangjaogo.

“Tan temendak Yemen yimjung senden takok ngudaktsütsü nükjidong nung tang tongpang rarar ajungai par tongpang rarabaren anena yimjung nung alitsü ajungshir,” ta Ahmed-i sangoktsü.

Geneva nung senden amenertemi tongpang rarabaren anentsütsü nükjidong nung coordination & de-escalation luden ka tanü tashi nung tenteta lir.

Parnoki yimjung senden amentsü tenzükba sülen timtem toushi ajurushia alir nüburtem, talisa Taez yimti nung alirtem nem nungdakba teyari agütsüdaktsütsü lemtetba den külemi, mangatettep adoka aliba sorkar aser sorkar anemer telok nati Yemen anülulentip tsütsülen, Lahj province nung pua aliba züngsem yashi Brehostibar nü melentepba osanga jangjaogo.