Yemhi College nung tasen purtem agizük

Dimapur, August 12 (TYO) : Yemhi Memorial College, Dimapur nung azüngtsü arur tasenpurtem nem akümtsübu agüja agizükba sentong ka Honibar nü parnok college nung liogo.
Iba sentong nung Global Open University, Nagaland nung Vice Chancellor, Prof.H.N.Dutta tongti tesemdanger liasü. Pai iba sentong nung jembidang, kaketshirtem shia molungjang nung pei tetsü tasoli meimba shisatsü aser sobaliba wazüka ayutsü tejangraba alitsü nüngdakba indang metetdaktsü.
Iba kasa sentong nung YMCSU nung tir Wb. Ashiho Swu-i tasenpurtem pelaa agizüka jembi aser College principal Wb.Makhan Chetia-i kaketshirtem dang azümesena melii pie mapa nung meranga inyaktsü ajungshi.
Taküm 2017 küm atema YMC Dimapur nung tasenpurtem rongnung Kongru Bamhaile Doson Miss Fresher shim aser Sangpang Limasangwa Mr. Fresher shim.