Yemshe benjung nung Yitachu-i Naga nungertem longjemtsü ayongzük

Kohima, October 5 (TYO) : Terenlok aser yimjung angutsü aser tarutsü putu jenjang tajung nung lidaktsütsü atema Naga nungertem longjemtsüla, ta School Education Minister, Yitachu-i ayongzük.
“Asenok ajaki Naga nunger atema bendanga agütsüshidi aser Naga nunger longjemba ajanga lokti nung temelenshi bener arudi” ta Yitachu-isa ashi.
Hombarnü Naga Solidarity Park, Kohima nung Pochury nunger Yemshe benjungmung nung Yitachu-i iba tayongzükba agütsü.
“Benjungtem amungba ajanga nübortem tali longjemdaktsür aser iba ya ajanga kin ka sasep nung dang masü saka kin balala tsüngda medemer yimteper. Yemshe benjung amungba ajanga Naga nungeri aginüba telongjem adokdaktsütsü imlar” ta paisa ashi.
Naga nungertemi yimjung aser telongjem aginür saka iba ya tangsa tangbo mongutettsü akok aser putu aika nungang ngutettsü akok. Anungji tarutsü putu jenjang jungdaktsütsü atema tanü putui tebilemtsü khuret bener taginüba tongtettsü atema inyaktsüla, ta Yitachu-isa ashi.
“Naga nunger lokti nung kin balala lemsa lir, saka Naga nunger tarutsü putu jibo Naga nunger ka küma longjemer lidaktsünür. Naga nungertemi akhümket aser renloka aoba taküm linüra telongjem, yimjung aser tangatettep alitsüla” ta paisa ayongzük.
Tanü sentong nung Commissioner Nagaland, Neihu C. Thur-ia o jembidang, Naga nunger kintem rongnung Pochury ya kin tanubosang lir, ta ashi.
1990 nung Pochury ya Naga nunger kin rongnung züngok aser 2011 census ajanga Pochury nunger nütsüng yongsük 20,000 shi aliba bushitetogo. Pochury nungertemi asen lennir tajung Yitachu sülen noktakang aser pai nübortem asoshi mapa jenti inyaktettsü asoshi sarasadem agi pa nungitang, ta Neihu C. Thur-isa Pochury nungertem ayongzük.
Tanü agiba sentong ya Pochury Hoho Kohima-i ayongzük aser mendenji Tir Thsela Thupitor liasü. PHK tiri tesentepertem pela agizük, Tarachu Fithu-i Yemshe benjungmung indang otsü metetdaktsütsü aser Nyuretho-i tepela o jembi.