“Yes I am” finalist Meyitemsü Naga-i Mkg nung dance academy lapok

Revolution Dance & Fitness Academy kibur Meyitemsü Naga den tsüngsang angazüknürtem kar noksa nung angur. 

Mokokchung, July 22: “Revolution Dance & Fitness Academy” ta sür anema aliba tasa aser tsüngsang tapu balala sayudak riju ka Mokokchung town nung lapokogo. Iba riju ya July 3, 2017 nü lapok aser iba ama tsüngsang sayudak riju ya Mokokchung nung ibai mezüngbuba lir aser tsüngsangba luyim nung ibai tapak tasen ka asütsü.
Iba riju ya Mokokchung SBI Lead Bank (Arkong Ward) anasato lir. Iba riju ya arishi küm 22 tain nüngtugu tsüngsanger Chuchuyimlang nunger Sp. Meyitemsü Naga-i lapok. Meyitemsü ya tanü Naga nunger tsüngsanger tajung rongnung ka ta züngshir.
“Mokokchung nung tsüngsangba riju ka lapoktsübaji kü pungmang ka liasü”, ta Tir Yimyim osangbeneri Sp. Meyitemsü ajurutepa jembidang pai ashi.
Pai dance tetoktepba aika nung takok nguogo aser sabang tulu aika nung shilem agiba nübu ka lir. Pa ya taoba mapang nüngtugu tsüngsanger telok ‘Ice Crew’ nung züngsem ka liasü. Iba den ano “Dance India Dance Season 5” tetoktepba nunga level 3 tashi atu saka pai Hindi junga mejembitetba agi tedendangertemi pa temaba level nung meshimok, ta angazüker. Pa ya Guwahati International dance academy ka nung instructor küm 2 tashi inyakba takutet tsüngsanger ka lir.
Pa nüburtemi tali shisanga metetbaji 2016 küm India nung reality show tulutiba Mumbai nung agiba “Yes I am” sentong nung grand finale jenjang atonger parnok 16 rongnung pa ya ka lir. Iba sentong ya ano metembang lir, iba asoshi pa mazüngi renemshidar. Pai anogo nung tajemba agi ghonda 6-7 tashibo practice asür. Pa ya robotic dance aiba nung kanga nüngtugu lir. Tang tashi nung Meyitemsü ama Naga nunger India lima reality show tulu nung oa shilem agir aikabo mali.
Meyitemsüi küm 10 tanur asüdang nungi pai tsüngsangtsü tenzük aser pai tsüngsangtsüba ya “Step Up” aser “Madd Chadd” amala movie reprangba nungi nungmesoa jangratsü tenzük. “Iba movie anaji kü taküm den kanga mesüka lir”, ta pai ashi.
“Mokokchung nung dance academy ka lapoka Naga nunger dang tsüngsang sayutsü tejangraba nung ni yangi aruba lir”, ta Meyitemsüisa ashi. “Naga nunger dak tsüngsangba luyim nung sempet lir, saka asenok sabang peria manguba den lenmang sayur tajung mali”, ta paisa shisem.
“Tanü Naga nunger sempet aketer lanur tajung aika lir, aji saka, pei sempet junga mamshiteti tom nung machimajemtsü agi taküm raksar alizüng metongteter”, ta paisa sasaba den lanurtem yamaji malitsü asoshi o ka ashi.
“Tanü asüngbo tsüngsangba luyim ya mapa tajung ka kümogo, asenoki dang temulung agütsürbo iba ajanga pei tepok sünga litetba den ano nisung ka nüngtugu akümtsü ngujem (scope) tulu lir”, ta paisa ashi.
“Iba riju lapoktsüba ya kü pungmang ka liasü aser aji atalokogo, aser kü indang tanabuba pungmangji iba riju nungi tsüngsanger tajung aika adokdaktsütsü kü nükla lir, aser iba atema ni akokba tashi merangtsü”, ta pai ashi.
“Dance ya saisapongba ka mesüka lir, iba yagi asenok temang anema yutsür, jashia alidanga/kümli aitdanga dance aiba ajanga süngjema kümdaktsür, dance-ji ni atema taküm nung mepaidoktetba maparen ka lir”, ta iba osangbeneri pa dang ‘Dance-ji na atema kechi?’ ta metetnüa asüngdangdang pai langzü. “Tsüngsanger kati tsüngsangba style ka nung dang malitsüla saka tapu aika angazük merangtsüla”, ta paisa inyakdaktsübanüba o ka ashi.
‘Tsüngsanger ka dak kechi noklem (qualities) sa keta alitsüla?’ ta metetnüa asüngdangdang, ‘tsüngsanger tajung ka akümtsü asoshi bendanga agütsüba, temulungtetba, tejangraba, libaliro aser chiyungtsü nung azüokba, meranga inyakba itemji alitsüla”, ta pai ashi. “Naga nunger dak tenük merem aser asüküm jakla lir, anungji, item yimyaji indoker kati ka ajungshiteptsüla, aji süra, asen lima nungi tsüngsanger tajung aika adoktsü imlar”, ta paisa shisem.
Iba dance academy nung anema alitsü asoshi tasa (fitness) balala den dance tapu telemsa aika sayur. Course ka nung tadem (level) asem lemsar sayutsü.Course kaji ita asem (3) agitsü. Mapangji anepdang aser nikongdang ta lemsaa lir, ibaji pei mulungba shimtsü akok. Tang tashi nung iba academy nung class agir parnok 30 lir.
Iba academy ya mezüng tenzüker asünung, nisung shia admission fee-ji senpak 1500/- dang agir (shitakbabo 2000/- lir) aser ita shia montly fee-ji 1500/- agir. Mezüng arur nem tama maongka agütsütsü, anungji, tejangrartemi yakta oa admission agitsü raktepbangma.