Yeveto yim tzü agi metzüngbangogo

Dimapur, July 13 (TYO): Niuland Sub-Division kübok Zubza ayong nung tzümetsüng ayimba ajanga ayongküm nung aliba yim, Yeveto tzü agi metsüngbangogo.
Niuland ADC, V. Lovitoly Sema, EAC leniba nung Niuland Kelevituo Nisa, Er. Sobou Angami, EE, Irrigation & Flood Control, Er Hotoi, SDO, Irrigation & Flood Control, Er Inaka Assumi, J.E (Power) aser Dobashi temi Yeveto yim semdangogo iba sülen parnoki yim ketdangsertem den jembia liasü.
Iba yimdak kibong 142 lir aser ki shilem 90 bo azükitem lir. Tzümetsüng ajanga ki raksatsüba dak alia tzülu tulu raksatsüogo aser kiset shiruru aika tzü agi ponger ogo, aser nisung aika talidak makai kümogo, ajisüaka nisung asüamaba osangbo mali.
Irrigation & Flood Control Parliamentary Secretary, Jacob Zhimomi-i achaayanga aser Irrigation & Flood Control EE ketdangsüba kübok tzümetsüng azüoktsü atema Zubza ayong nung rongdak atema Coffer Dam den bed bars asem aser wire nets boulders inokogo.
District administration-isa tang rongdak atema yimdaklirtem nem senotsü teyari den chiyungtsü agütsüogo.
Iba dak alia tim department/sorkar dang iba nüngdak ya kanga tongtibang ta züngshia inyakdaktsüner, iba den külemi küm shia tzümetsüng ajanga iba yim kongshiba teti atema anentsü atema iba project tekaraba nung agizükdaktsüner ta mepishiogo.