Yi ajanga anogo shia India nunger nisung 15 asür

New Delhi, May 29 (Agencies): Yi nokdangba onük nung India tesem ajaklen o atsütepdang India nung yi ajanga anogoshia nisung 15 südar, mesüra minute 96 shia nisung ka südar, ta 2013 National Crime Records Bureau (NCRB) data asadangba sülen IndiaSpend-i metetdaktsü.
May 23, 2016 nü Tamil Nadu Chief minister, J. Jayalalithaa-i state nung yi store 500 shibangja liasü. Taküm April ita nung Bihar sorkari yi ayokba, yi yangluba aser yi ajemba khenyongi nokdang aser 2014 August ita nung Kerala-i five-star hotel tem dak alaka yi ayokba nokdanga liasü.
Ibaji masüdang poll survey  agidang Kerala aser Tamil Nadu naprong nung nisung aikati yi nokdangtsü pusema liasü. Kerala nung tebur aser tetsür shilem 47-i yi nokdangtsü pusem aser Tamil Nadu nunga shilem 52-i pusema liasü.
Poll survey nung telangzüba agütsürtemi tongtibangba kuli agütsübaji, yi ajemba ajanga kibong nung rara adokdaktsür, ta langzüa liasü.
Item state nung menokdangi alidang India nung Gujarat aser Nagaland state na nung dang yi nokdanga liasü.
Yi ajemba dak sentakba ajanga asürtem timbaji Maharashtra lir, iba sülen Madhya Pradesh aser Tamil Nadu na lir.
BBC den jembidang Tamil Nadu nungi Makkal Adhikaram (People’s Power), S. Raju-i, “Yi ajanga ozüng alema inyakba mapatem aser lendongtem atalokdaktsür aser iba ya ajangasa auyaba aser tetsürtem dak tim mesüi benshidaktsür,” ta ashi.
Raja-isa, “Tamil Nadu nung arishi küm 30 tekübokpur amitsür aika alibaji yi ajemba kuli ajanga lir,” ta ashi.
Melungtet telok, Alcohol and Drug Information Centre-ia, “Kerala nung ozüng alema inyakba ken o shilem 69 aser mozüki ajak nung tenüng züluoka alirtem shilem 25 bo yi ajanga lir,” ta ashi.