Yi atakatem

Nisungi yi ya tajemtsü yanglu anungji ajemtsüla. Ajisüaka, asenoki yi ajem mashiba ajanga asenoki yi ajemer masü saka yi nemang asenok aika jemdaktsüogo aser jemdaktsüdagi. Iba jagi asenoki yi ya atakatemer endokogo. Aji tim. Aji oda, yi-i asenok atakatem masü saka asenokiang yi atakatem nungji asenok ajak asoshi yi ya tsükchir danga tamajungba kümogo. Ibaji meteta asenoki asenoksasa achiajem nung kanga azüoka alitsübaji nüngdaker. Atangji asenoki yi atakatem masüdangyongi yi agi asenok yimten, lokti aser kibong raksatsüba otsü aika liasü. Aji oda, yi jemer dang masü saka yi ayokertem kibong tashi nung mazükmaru atenba asenoki angutsü. Item ajakji asenok asoshi tansütsüsa asenoki ngua ataloker. Ajisüaka, asenok aika asoshi tia majungtibaji asenoki tan masür. Tanü asenok loktiliba nung reprangdangra yi ajemba ajanga nisung tepsetba lendong atalokpet atalokba angur. Akhidang, asenoki yi atakatem masüdanga yi jemer züktepba osangbo angashiogo saka yi jemer nisungi nisung züksetba otsü kangabo mangashi. Aji oda, tanü asen lima nung asenok rongnung yi ajemba aser yi ayokba ajanga nisung tepsetba lendong atalokpet atalokba yagi asenok libaliro jenjang khen jungjunga meyipa reprangdangtsü nüngdaker. Atangji, tajemer aliba agi tayoker adoker saka shitakba bilemdangra asen lima nungbo yi jemer dangbo yi ayokertemang tia tamajungba küma aotsüsa asenoki ataktemogo. Asenoki metettsüba kaji asen lima nung government-i yi mamshitsü ozüng azüngba ya yi majemtsü azüng masü saka yi meyanglutsü aser mayoktsü ozüng azüngba lir. Ajisüaka, kibong aikati kecha matidaki odi-odia ayoker aser tesem aika nung yi ayoktsü tebilemba nung tzü ayokba dokan lapoka lir. Iba ama mapaji metetsümonga atakatem meshiba mapa ka asütsü. Atangji, tia majung kaji nisung kari alima nung mapa inyaktsü aika lir ser nung ozüngi memelaba dang inyakner. Ibayongji, item nisungtem jagi kechi ozüngi memelar item mapajiang jangratema inyaker. Aji oda, parnoki iba ama mapa nungjiang tajangzük teimba lir amato bilemer. Nisung tsüngdang shitak mesükba lenmang amato saka tatembangjibo tasüba ta asüba lenmangji yi ayokba mapa yaa ka asütsüa akok. Ashiko, karibo majunga ta angateta yur tanga business lenmang mengutetba ajanga inyaker asütsüa akok, ajisüaka item jagiang jungjunga bilemdangang aser yi ayoktsü melenbo jangotsüang yokang. Atangji, yi meyokdaktsütsü aser mejemdaktsütsüba mapa nung yimten aser arogo khuret lir. Aji oda, yimteni ozüng amshia nokdangtsüla aser arogoi tangatetba agüja temulung meyipdaktsütsüla, Ajisüaka, ozüng o tangatetba na ajanga inyakba denji ano akok tashi yi ayoktsü melen ozüngi melaba business inyaktsü asoshi lenmang sayuteptsübajia kanga nüngdaker. Aji oda, government tsütsüa yi ayokertem asoshi tanga mapa inyaktsüsa lenmang lapoktsüra  aser ano arogo tsütsüa yi ayokertem ki tonga oagi sarasadem mapang agüja yi ayokba mapa melena tanga mapa inyaktsü ajungshitepa lenmang sayutepra, ajiang tajungba aser takok tanguba asütsü. Joko, arogo  budget nunga pei arogo yari nüngdakba purtem nem tetemlok maket ser sen apuja yaritsüsa senotsü enoktsüla. Iba ama senji arogo züngsemtem rongnung nüngdakba purtemi aputsü aser ano yi ayokertem nema aputsür yi ayoktsü melen tanga mapa inyakdaktsütsü. Iba amaji yimten aser lokti nunga  tajungshi o agidang masü aser arogo nunga sarasadem agidang masü saka mapa agi ozüng mangartema ozüng angadaktsütsüsa aser Tsüngrem metsüburtema Tsüngrem tsübudaktsütsüsa inyaktsüba mapang tongogo. Iba ama inyakyim agidang asen lima nung asenoki yi tongpang ya akoktsü. Talisa, nübortemia angatettsüba kaji tangar asoshibo yi ya chiyongtsü tajung ka asütsüa akok saka asenok asoshibo asenoki yi atakatemba o aser mapa to meyipa magi tashi yi ya  yiar akümtsüba tzü aser atakatem angutsü ajemba chiyongtsü ka dang asütsü !