Yi ayokba agi tanur züngdaktsütsü na ?

Nagaland nung yi yanglua ayoktsüla aser iba nung jagi government dangi aruba alimelen sen agi government school nung azüngertem yaritsüla ta, tangari masü, School Education department nung advisor-bai ashiba o ji meimlaba aser kanga mapetba o ka lir. Nagaland nung yi meyanglutsü aser mayoktsü ozüng zünga liaka takok ngua mamshitetba agi, yi ya menokdangang tajungba ta aikati jembir. Atangji, yi ya temesepba chiyongtsü, anungji tajungbo masü. Iba jagi shinga tsüraburi pei chirnurtem dang yi ajemtsü majungshir. Ajisüaka, yi meyanglutsü aser mayoktsü ozüng zünga aliba takok ngua meinyaktetba ya takok ngua inyakdaktsütsüsa yariteptsü melen, tamakok anguba tenüng nung Nagaland nung yi yanglutsü aser ayoktsü melatsüla ta bilemba tangatetbajibo, government school-tem ya anepaludangyonga majunger, anungji ajak shibangang ta asüba amato ka asütsü. Ashiko, Nagaland nung yi yanglua yokdaktsünüba ya jenjang dalang agi yi tajung jemnüba agi asütsüa akok, tejemner asoshibo aji shitak, saka asenok taintem jenjang dalang agi yi tajung ajemba agi asen chirnurtem tajung küma manitettsü. Yi ajem tenzükba ya anguba agi tenzükba lir, anungji yi agi taküm raksar ta angatetra, asen kidang dang masü saka asenk kiyong aser asen yimti aser asen lima nung yi mangutsüla. Atangji, asen lima nung yi nokdangaka, tajemerbosa lir asünungji, ozüng alema yi yanglur aser yi ayoker aika adoka lir. Aji oda, talubosa manguba temesepba chiyongtsü ayoker asünungji, jenjang tasak agi ayoker saka tajemertemibo odang alia ajemer, anungji yi ayoker aika takar küma alitsü. Ashiko, item yi ayokertem jagibo yi meyanglutsü aser mayoktsü ozüng ya takangba-ang yangludaktsünüa alitsüa akok, kechiyong, kanga tia maka, parnok asoshibo yi ayokbajiang taküm lenmang kümogo. Alima nung shir kibong südirsüaka, kibong mesütsü aser taküm lia aotsü atema mapa kabosa inyaktsüla aser iba mapaji ozüngi melaba aser Tsüngremi mulungba mapa asütsübaji kanga tongtibang lir. Ajisüaka, yi yoka kibong mesüba mapa dang masü saka nisung aikati ochimashi aser tashiyim amshia inyakba nungi anguba sen agi kibong mesür aser karbo pei mang yoka kibong mesüba purtema lir. Itemji asenoki jangratema bilemer asü ? Yi ayoktsü asü mayoktsü ta asübaji asenokbo government nung alirtem nem yutsüdi, saka yi ayokba nung aruba sen agi asen chirnurtem school züngdaktsütsübo mebilemli. Yi mayokyonga, alima meimchirtem chia ajemba chiyongtsü aser taküm nüngdak aika lir, anungji item rongnungji ka yoka kibong anepalutettsü aser loktiltiba nung tsüraburtema aser chirnurtema nümadanga litettsü. Alima nung rongsen aika bendena takar akümba ya tongtibang masü aser yimten nung tulur küma menden tajung ka nung amenbajia masü, saka pei mapa agi , pei kibong agi, pei tsürabur agi aser pei chirnurtem agi nisung ka loktiliba nung nümadangteta alibajiang tongtibang aser takümji jangratema alir. Aji oda, Naga nunger jala jabasotembo yi ayokba agidang kaketreju anepalua züngdaktsü nung dang, government school junga akümtsü ta School Education department nung walunisangi bilembaji, ano khen ajaki jungjunga bilemdangtsü junger. Nagaland nung government school majungba ya senotsü meperiba agi masü saka ketdangser aser tesayur tajung agi meperiba ajanga lir. Tazüngtsübo Nagaland nung government school tesayurtem agir magima aser government school asoshi center nungi yokba sen agi Delhi nung Aam Aadami Party government-i yangluba ama ‘International school ‘ mesüka yanglutettsüsa yoker. Ajisüaka, Nagaland nung government school ki aika talaor lir aser government school nung azüngertem nem aküm magütsütetter. Iba ama tia ka nung Nagaland government school nung sayur tesayurtem aser azünger kaketshirtem pei mapa aser pei kaketreju agi aküm angutsüsa inyaktsübaji, yi ayokba sen agi masü saka asen akaba sempet aser asenok nem Delhi nungi agütsüba sen ajak ochishia amshiba agidang tongtettsü. Yi ayokba sen nungi aruba alimelen agi langka tajung inyaktsü bilemra, ajibo yi ajemba agi shirangertem aser balalulartem yariba nung amshitsü bilemtsüla.