Yi Ayokertem Ayatai

~ Mrs Mapukala Pongener, (Chuchuyimlang)
Merangmen, Tzürangkong.

Reprangangjo! Yimti yimdong ajaklenji,
Watsü,Wapong,Tetemjen taküm jenti,
Meimchira masü, shirurua masü ta,
Mangatena jajartemji,
Apayuseter, temulunga ayanger… ya koda asütsüaka !
Ozü lima ramoka anitsüpurtemtu… kechi akümeraka!

Jangratemtsü kibong tajungtem to,
Raksatetogo …. kechi sayangtsü ya !
Tetemjen kinungbo aser obalatem-i
Jangratem ki to memenungrai kümogo.
Aturatzür aika temeimtsü chimur toktsür sayatenyadarji ,
Ya kechi tesüngmangtsü putu! Tetsüria Yi ajemer na!
Khristan lima nung kibong aser taküm to yamai aküm no?

Shisadangangjo! Yi jemer kibongtemji.
Sentsü agi tsübanger, Tanurtembo tepok sünga mechiyong,
Aben süoshi aser kaket shisatsü bushitsübo pongmang kümdaktsüogo.
Anepdang sakli nungi amang ayaterm tashi,
Yi ki nung takaba rongsen ajak lalur.
Kinungtsü aser chirnurtem nungi menürem jakten tepela tu samadaktsüogo..

Süra ya shibai raksatsür ! ibai shir mapa !
Tayoker melilasang, tajemera melila.
OH! Yi ayokertem, Na takar kümnudang
Meimchir kwika leperi idaktsü ! Ojalatem kwika amitsiir küma lir!
Lar temeimtsü tanurtem zünger mezüngma lajar kümadokogo ..
Ano tapayutsü takümtem aika leper kümpang nung nokdaka lirji..

OH! Khristan lima nung Yi ayokertem ! Nai shimtetba mapa yabo ..
Tajungbosa masü, tepelatsü mali.
Nai inyakba mapa tamajung yagi ozü temulung ateta atsünger.
Yi ayokba sen jagi longru ki amentepa yangluaka,
Nür jala jabaso asoshi rongsen jenti rizünga yujaka,
Amajok dang akümtsüa ni..orija ozü ama yima aotsü,
Nür chimur aser semchisemnur tashi Tsüngremi atakatemtsü.

Kenü pamoki na atakatema jembitsü !
Ozü tzüraburia ya tashi inyaktet no ?
Nü tenük agi aji angutsü,
Nü narongi aji angashitsü.
Nai kanga sasatsü, saka menur asütsü.
Tebui tasen achi, semchisemnur tashi tepu mejem.
Nai ya shidakba ajurulanglangsa .. Ayatai, Ayatai, Yi ayokertem !