Yi menokdangtetba tebilemtsü

Mokokchung nung yi talubosa ayokba osang ka ABAM, Ao Senden, Watsü Mungdang aser AKM teloktemi anir sangdongba osangji government tamakok dang masü saka asenok ajak tamakok asütsü. Nagaland nung yi kenyongi meyanglutsü aser mayoktsü atema ozüng latetba ya Mokokchung town nungi tenzüka Naga lima ajaklen nübortemi ola adokba ajanga government-i latetba ozüng ka lir. Atangji, government-ibo Nagaland nung yi kenyongi tak ta meyanglutsü aser mayoktsüba  ozüng latettsüba yabo kenyongi memulungi liasü. Ajisüaka, talisa arogo nungertemi Nagaland ya yi meyangluba aser mayokba lima ka kümdaktsütsüla ta  lumia takangba agütsüba marem government-i yi meyanglutsü aser mayoktsüba ozüng ya latet. Tetezü, government nung alirtemi angatetba agi masü saka arogo nungertemi anung marem latetba ozüng lir, iba jagi government-i temulung agüja meinyaker südi. Tanüa asenoki nisungtemi jembiba aser bilembatem angadangra, külen Arogo aser lokti tentettemi yi meyanglutsü aser mayoktsü ozüng lateta aliba ya mapa küma inyaktsü akanger saka ano külen government nung alirtemibo yi meyanglutsü aser mayoktsü ozüng lateta yutsüba ya agiener amai jembiba asenoki angatetter.Iba ama tangatetba aser tebilemba ana tsüngdangji ajuruteptsüsa lenjem angutsü kanga tasak lir, kechiyong arogoi kodanga yi terarabo ayoktsüla aser ajemtsüla tabo mashitsü. Iba ama tatsütep tensa ka nung asenoki kechiba arogoi anir yi meyanglutsü aser mayoktsü akanger aser ano külen kechiba government-ibo terabo yokdaktsüner ta asübaji khenbo bilemdangtsüla. Arogoi yi meyokdaktsünübajibo tangatet dang lir, kechiyong yi ajemba ajanga lanurtem aika taküm raksar, nisungtem aika sentsü agi tsübanger kibonga memesüteti tebu ka mesüra kinungbo ka ama meraketa melitetter. Yi ajemba ajanga rarabangsen adokdaktsür aser yi jemer mapa tamajung inyaktsü kecha nungnanga mebilemer. Atangji, yi ajemba ajanga kibong aika sensak tiai iogo aser balaa balaogo. Yi jemnertemi aser yi yoknertemi yi meyanglutsü aser mayoktsü ozüng latetba ya anema jembitsü akok, saka parnokia pei chirnurtem dangbo yi ajemtsübo majungshitsü. Ano külen, yimten yimsüsürtemibo kechiba yi yanglua yokdaktsüner ta asübaji bilemdangra, tang Mokokchung nung amaji, alima asünungji, kechi techi aser kechi tejem ta asür, tia makar karbo itemjiang yoka kibong mesüner aser itemjiang chia jemnür, anungji talubosa masüyonga ozüng takang lateta yur yi ya terarabo ayok melatsüla ta government nung alirtemi bilemer südi. Ibaji dang masü saka kodang asen lima nung yi yokdir, iba nung jagi alimelen saruba senbo government senpongi aiter, anungji tangbo government-i nübortem meyong shilem nungi aluzüka masü mesüra raktepa masü saka yi yangluba aser ayokba nungi alimelen saru meshiba ajanga nübortem asoshi teyari aser terenlok mapa inyaktsütettsü. Atangji, alima ka ajungtsübaji sen agidangbo masü saka tongtibangtibaji peisasa azüokteta aliba aser teyari agütsütetba senso tajungtem alitsüla. Itemji chiajemer aser tashiyim amshir masü saka Tsüngrem metetba, tashitemetet aliba, teinyaknü aser teyarinü sensosangertem asütsüla. Item ama lanurtemji yi meyangludak aser mayokdak lima ka nungang intettsü. Iba tangatetba nung shitakba asen lima ya yi manguba lima ka kümdaktsüdi süra, Excise purtemia kanga junga mita inyaktsüla aser lokti tentettemia tang amaji mapang mapang shia asen yimti aser asen lima tia asadanga lokti timtemdaktsüba aser akoksadaktsüba mapatem anema ola adoktsüla. Aji oda, yi meyanglutsü aser mayoktsü ozüng latetdaktsüba telok, arogo lenirtemia yi yanglur aser yi ayoker kibong tonga oagi anogo shia ta mesüaka hopta nung kenbo sarasadem mapang agitsüla. Atangji, arogo karibo yi ayokertem nem yi ayokba anener tanga business tenzüka inyaktsü asoshi sendem melii sen aputsür. Iba ama mapa tasen aser tajung jiluji ajizüka inyaktsüla. Atangji, iba ama tongpang yabo lumia sarasademba agidang akoktsü.