Yi nokdangba ajanga Bihar lokti melenshidar: Nitish

Patna, April 16 (Agencies): Bihar nung yi meshiimeshi nokdangba sülen teburtem rongnung yimya melenshiba reprangteter ta shia tanü Bihar Chief Minister, Nitish Kumar-i, yi nokdangba ajanga Bihar nung loktiliba melenshidar, iba yongji Jharkhand aser Uttar Pradesh state na nunga yi nokdangtsü atema tetsürtemi takhangba agütsür, ta ashi.
Tanü Samastipur nung ‘Baba Kwal Maharaj’ fair lapoktsüba sentong nung jembidang Kumar-i, “Jharkhand aser Uttar Pradesh na nunga tetsür tentettemi yangjia yi nokdangba nung yaritsü atema ni jaokogo,” ta ashi.
“Maharashtra nung Wardha district nungi osang ka ajanga, yi ayokba aser ajemba meshimeshi nokdangba atema Bihar-i arua kü nem tenüngang agütsüner ta shiogo,” ta state nung yi mayoktsü atema April 5 nü sangdongsang Kumar-i ashi.
Tamil Nadu nung yimtenren party tongti ana- AIADMK aser DMK natia, parnoki election nung takok ngura state nung yi nokdangtsü ta sangdongogo, ta Bihar Chief minister-isa metetdaktsü.
Bihar nung yi nokdangba ajanga loktiliba melenshitsü atema tajemdakdak yanglutetogo, ta Kumar-i ashi.
Pai ashiba agi, “Tangbo teburtemi yi ajemba toktsür pei kinüngtsür tem den joka nung yariteper ta Samastipur nüburtemi kü dang shiogo.”
Paisa, tangbo yimtsüngtem tesünep nung lir, kechiyong tamalenbo teburtemi yi jemer raratepa liasü, iba den külemi teburtemi pei kinüngtsürtem dak azükba tatalokbatem ajema kümogo, ta ashi.
Tanü iba sentong nung assembly Speaker, Vijay Kumar Chaudhary den ministers- Madan Mohan Jha, Alok Mehta aser Rajya Sabha züngsem, Ramnath Thakur nungera liasü.