Yi nokdangtsü atema Nitish Kumar-i UP CM dang mepishi

Lucknow, May 15 (Agencies): Bihar chief minister, Nitish Kumar-i Uttar Pradesh Chief minister, Akhilesh Yadav dang state nung yi nokdangtsü atema bilemdangang ta shiogo.
Nitish Kumar-i, Uttar Pradesh-Bihar arrtsülen yi ayokba mita reprangtsü atema pai temepishiba shidi ka yok, ajisüaka Akhilesh Yadav’er sorkari iba shidi telangzüba magütsü, ta aitsü.
Pai ashiba agi, April ita nung Bihar ya yi meshimeshia nokdangba state, ta sangdongba sülen state ana arrtsülen yi ayokba dokan aika kümogo.
Deobarnü Lucknow nung Kisan Manch-i yi nokdangtsü atema ayongzükba sentong ka nung jembidang Nitish-i, “Ni Bihar nung yi menokdangi alidang nisungtemi yi nokdangba ajanga state nung timtem aika adoktsü ta jembia liasü, ajisüaka ni yi nokdang,” ta metetdaktsü.
“Item ama tetsüdaktsü tsübua malitsüla. UP nunga yi ayokba nokdangang,” ta Kumar-i ashi.
State ana arrtsülen yi ayokba nokdangtsü atema shidi ajanga mepishi, saka UP CM-i telangzüba magütsü ta shia Kumar-i, “Teyari kecha magili, kü shidi-a pai (Yadav) mezüngshi,” ta ashi.
Kumar-isa, Bihar chief secretary-ia UP sorkari dangi kasa shidi ka zülu saka amajok dang liasü, ta nemjema ashi.
“Excise Act ajanga, state telung nung arrtsülen aliba district nung kilometer telungtet asem tsüngda nung yi mayoktsüla. Ozüng benoktsü atema dang onoki lenmang bushir,” ta Bihar CM-i ashi.
“Shitakba nungbo Ato kilonser, Narendra Modi-ia yi nokdangba pusemser, kechiyong pa Gujarat nung chief minister inyakdang pai yangji yi maneni nokdang. Bihar nung yi junga nokdangtetba nung ajemdaker tanga state tem nung yimtenren lenirtemia iba onük benokdar,” ta Nitish-i ashi.
“Kerala-i mapang telemsa yur yi nokdanger aser Tamil Nadu nunga senior DMK lenir, M Karunanidhi-ia, Bihar-i yi nokdangtetra asenokia nokdangtettsü ta jembiogo,” ta Kumar-isa ashi.
May 12 nü JD(U) Party nung inyakertem senden ka nung jembidang Nitish Kumar-i, “Bihar nung takok ngua yi nokdangtetba sülen UP nung yi nokdangtsü atema ni May 15 nü Lucknow nung nüboyim tenzüktsü,” ta metetdakja liasü.