Yi nokdangtsü atema tetsürtemi Nitish nem nübo yimdaktsüner a

Patna (Bihar), May 08 (Agencies): Maharashtra nung yi nokdangba maparen nung teyari bushia Deobarnü Maharashtra nungi tetsür tentet kari Bihar Chief Minister, Nitish Kumar ajuruogo.
Tanü Chandrapur Shramik Elgar Group Tir, Paromita Goswami leniba nung teshimtet züngsem telok kati Patna nung Nitish Kumar’er kidangi oa pa ajurua liasü.
Iba senden tembangba sülen osangbenertem den jembidang Goswami-i, “State nung yi nokdangtsü atema nüboyimtsü asoshi onoki Nitish Kumar jaokogo. Onoki jaokbaji pai agizükogo aser pai Maharashtra semdanga yi anema nüboyimtsütsü ta onok dang shiogo,” ta metetdaktsü.
Yi anema nüboyimtsütsü atema tamalen Uttar Pradesh, Jharkhand aser Odisha state temia Bihar chief minister, Kumar jaoka liasü.
Nitish Kumar-i Bihar nung yi meshimeshia nokdangtsü atema telemtetba agiba ajanga Maharashtra tsürtem temelung kanga chia liasü ta shia Goswami-i, pai (Kumar) kanga junga yi nokdangtetba ajanga yangi aliba tetsürtem kanga tia kaogo, ta ashi.
Lai, “Onoki (tetsürtem) Maharashtra nung yi nokdangtsü atema rara aser yaküm April 1 nungi Chandrapur, Wardha aser Gadchiroli nung yi meshimeshia nokdang, ajisüaka Bihar nung benokba ama masü,” ta ashi.
“Item district asem nung yi junga nokdangtettsü atema onoki Nitish leniba nüngdaker,” ta laisa ashu.
Parnoki Kumar nem tenüngsang agütsüba den külemi tabenba sü ka den nüngo oset ka sempeta liasü.