Yihova Tezüngzükba – T.Ken 144:1-8

Kechiba takoksang Tsüngremi asenok dak temulung agütsür ? Pa taochi agizüktsüsa asenok shirnok ? Dawidi iba tasüngdangba tekong 3 nung asüngdanger. “Kibuba nai meimchir metettsüsa kechi lir ? Mesüra nai nisung chir züngshitsüsa kechi lir ?”

Tsüngremi asenok züngshitsüsa asenok kechi lir ? Asenok teyakyak asü ? Shiruru karbo asenok dang nungi tashi taitba lir. Asenok temeshi asü ? Masü, asenoki Tsüngrem anema temenen mena. Asenok tamang katetba lir asü ? Aiben asenoki Pa dang tashi manger. Meimchir tangatetba tsütsü nungi Tsüngremi asenok menungratsüsa asenok dak kecha maket. “Nisungji tangula ka dang mesüka lir; Pa anogotemji süia aoba akhüm ka mesüka lir” (t.4). Teti takümji mokozü alungba mesüka lir. Parnok angur idangjisa parnok oadoker.

Kechiba Tsüngremi asenok dang temulung agütsür? Kechiaser Pa taochi aser yimli bilem agi asenok dang meimer. Idaki Dawidi Tsüngrem amshiba tetezü Yihova Tsüngrem, taochi tezüngzükba akaba Tsüngrem ta amshiba lir. Pai asenok dang tenangzükbatem nangzük aser parnoki pa dak amangtsü akok. Dawidi Pa “Kü mulung aser kü mitsa, kü tashi tait lungki aser kü kümzütsüba, kü jong aser Pa dak ni jenokdak bushir” (t.2) ta rasaa ashi.

Ibai asenok asoshi rasaa ashitsü kanga tarok miim o lir, saka metettsü asoshi asenok asoshi kanga tarok masü. Kechiba Tsüngremi asenok dang temulung agütsür asenoki mangatettsü akok, saka Par chir kilir ka asütsü aru ta asenoki metet. Pa kangki nung asü, asenok asoshi tenla agütsü, aser tang pa kotak nung lir, asenok asoshi mepishitsür.

Tsüngremi asenok dak temulung agütsür kechiaser Pai asenok meimer aser asenok taküm ajanga pa sentsüwangshiner. Pa den jajaang aser ne taküm Pa sentsüwangshidakjang.