Yihuda nunger Shin O. 30 (thirty)

– T. Tsükjem Jamir
Senso Missionary , Longsa Baptist Church.

Shisataka Chubatemi mapang aser tensa balala ajak nung nisung kati koda libalirotsü tim talisa kija kibong acha-ayangtsü aser lokdi balala den koda sentaktepa alitsü aser pei taküm koda Tsüngrem meteta alitsü, ajidang masü makamaiter den koda yaritepa alitsü indang sayur. Aser ano pei tsükchirtem dang koda tai adoktsü tim, item indang shin otem 30 (Thirty) indang (A. Shin 22:22-24:21) nung shia lir. Item tejen shin otem ano tali rajemtsü mechi oren tatsüba agi adoktsür :
1. Nai kodanga sensakertem nungi kecha rakzüka tagi, aser parnok mapa nung rishikangshi tesü, shirnoki sensaker merenshidir Kibubai parnok merenshitsü.
2. Ainabong aketba aser rasarabong taküm den kodanga temedem ashiko nai pa nungi mapa tamajung angazüktsü aser nü taküm raksatsü.
3. Nai kodanga nü medemer tangar dang sen apudang kuli tei. (Guarantor) kechiaser iba kuli jagi na tesülen timtim tulu ajurutsü akok.
4. Nü tsüraburtemi yutsüba (ali kimong) akhi arrtsü tagien (within the village).
5. Nai nü mapa meranga inyakra na kodanga tangar alar (slave) süa timtema malitsü.
6. Kodang nai tulur den chiyongdir parnok chiyongtsü yi (wine) tenükshi kechiaser itemji nü tanüla taküm asoshi kulaoktsüba chiyongtsütem lir.
7. Na yakta takar akümtsü temerang, nai itemji menokdangra nü taküm yakta lendongi aitsü.
8. Tekuro nisung meyong chiyongtsü nai kodanga meshia techi, kechiyong pai chiang, jemang ta ashitsü saka pa mulungjang nung na meima mali.
9. Tamashir nisung ka den mapang endoka tejembi, kechiyong pai nü tashitemetet o sensatsütsü.
10. Nenoki kodanga akhi arrtsü (International boundary) atena tuo mesüra teraksa, ibaji raksara kin ana tsüngda mangatettep adoktsü.
11. Tsüngremer ozüng ter (10) tesayuba nungji nü mulung tenang, aser iba nungji nü shisatsü aser nü mulungjang yuang.
12. Tsüraburtemi pei chir temetongshiba kodanga sota teyu, nai pa dak artsüng agi zükra tarutsü nung pa taküm timtim nungi kümzüktsü.
13. Nai nü Tsüngrem meimra kibubai na kodanga mesendoktsü.
14. Nü mulungjangi temenen pur tenükshi, yamaji asüba agi nü teimla kodanga mesamatsü.
15. Nai yi (Wine) pur rongnung aser chidiyongdir telok nung temen,
Kechiyong yi pur yakta samatsü.
16. Na asoba nübu tang akhümtsübuang aser netsü tantsür akümdang tesemba.
17. Nü mulungjang teti kibuba dak yuang aser nüktapangta tsür nungi jenang sürapangla na takoker taküm ka akümtsü.
18. Shisa maka nisungi yi (Wine) den tembar ayimer aser meilungi parnok takümji min peri mechiba ama samatsü.
19. Nai nisung tamajunger den temetem, kechiyong parnoki mapang mashi ka nung nü taküm ashioktsütsü akok.
20. Tashitemetet ajanga pei ki tobur junga renemer, aser pai par kidang sentilong agi sünga bendener.
21. Tashitait nisung dang nungi shisa taka nisung tashitaitba.
22. Shisamaka nisungtemi lokti nung o jembitsü tasü meitetter.
23. Shirnoki teti mapa tamajung inyaktsü jangrar nisungtemi parnokji sempar.
24. Lendong mapang nung na lulara nü taküm samatsü.
25. Shirnok timtem nung lir, parnokji nai yakta kümzüktsü merangang, kechiyong parnoki pei taküm samatsü ta memetet.
26. Ninang mojitzü tanang ama, nü nülai kibuba shisatsü nentaka bushitetra, nü takümi kotaker senmang angutsü.
27. Temeshi nisungbo tenetben (7) laoka, ano pai tanaben sakteter.
28. Nü tsükchir lendong ajurudang na tepela, kechiyong kibubai aji sempar.
29. Mapa tamajung inyaker aliyongbo nai tenemnem, kechiyong kobi melii parnok samatsü.
30. Nai nü Tsüngremji tensa mapang ajak nung bilemtetang sürapangla na tanüla nung takoker taküm ka akümtsü.