Yijemer nem teyari agütsütsü Teinyaktsü kar

Na mesüra ner kinungertem yi ajemba mazüokteti kangshia alitsü akok aser nisung aikati nai koktettsü ta ashiba angashir alitsü akok. Hao iba yimya sübaba inyakyim ya yi ajemsang kijai mulungtet nungdang toktsütettsü saka kinunger tembartemia inyakyim balala agia teyari agütsütettsü.
Yi jemertem nem teyari agütsütsü jenjang kar yamai agütsür:
Yi ajemsang mesüra la yagi ni parnok asoshi kanga khuret bena bilemdar ta memetet alitsü akok anungji nai parnok dang ashitsüla. Iba sensaksemtsü asoshi nenaprongla atema kangabo temela masütsü akok saka iba ya kanga tongtibang. Item sensaksem ajanga nenok temeim metetdaktsütsü aser aria bilemba angateta pa/la nem teyari agütsütsü.
Nisung kati yi asaa dangbo majemer, parnok taküm nung tebilemtsütem aliba tepungbaba kümdaktsütsü asoshi yi dangi meyiper asütsü akok, anungji item amala nisung indang tebilemtsü angatettsüji kanga tongtibang.
Sensaksem mapang yi ajemba tebilemtsü indang metetdaktsütsü asoshi tatishitsü tejangja meteta alitsü nüngdaker. Nenoki tebang agi parnok meimer ta ashitsü akok saka kuli tejangja ka magütsütetra ajak amajok asütsü.
Parnok nem ozüng/tetuyuba agütsütsü melena tajungshiba mesüra teyari ang agüjang.
Kanga dang tongtibangji nenoki parnok taitsü mesüra maak tesütsü. Iba ajanga parnok sasa kanga ajema bilemtsü aser tebilemtsü tuluba akümtsü.
Nenoki yi ajemba toktsütetba nisung kar meteta lira parnok den sensaksemang aser parnoki kechi jenjang agi itemji angazüka temeim agi sayutsü merangang.
Source : Internet