Yijemertem jenjang tajemba nung temang tendangtettsü

Dimapur, Metsüremi/March 19 (TYO): Asen state nung yi ajemba dak sendakba nung yijemertem temang anepaluba tsütsü timtem balala ajuruba ajiteta jenjang tajemba nung clinical test agitsü asoshi North East Artist Network (NEAN) Drop in-center for alcoholic aser District Hospital Dimapur (DHD) na March 18, 2020 nü Memorandum of Understanding (MoU) ka zülutepogo.
Temesepba miim mozü achiba dak sendakba tebilemtsü dak alaka Nagaland nung yi ajemba ya nüburtem temang ashoshi khuret tuluka lir, kechiaser state nung küm 30 shi NLTP Act benoka liaka ozüng alema yi tamajung bener aita ajemer.
DHD aser NEAN na tsüngda MoU ka zülutepba nung Kidney function test (KFT) aser Liver function test (LFT) amala clinical test ya jenjang ajemer DHD nung test ka asen 150 agi agitettsü, aser ibai shilem 50 agi tajemba kümtsür, aser NEAN DIC ajanga agütsüba subsidized rate ka tanga den medemdangra kanga agi tajemba lir.
Iba teyari agitettsü asoshi nüngdakbapuri NEAN Drop In-Centre nungi “Clients Referral card” meshitsüla, aser aji medenra iba service magitettsü. NEAN Drop In-Centre-isa nüngdakbapur nem angadi Hepatitis C virus mozütem agütsütsü.
NEAN Drop-in Center yagi temesepba miim mozü aser yi achi-ajemba agi kongshia aser timtema aliba kija-kibongtem nem teyari balala agütsür. Nüburtem nem awareness aser health service agütsütsü aser achia-ajemba nungi takok angutsü asoshi ajungmesotsü nükjidong nung NEAN Drop-in Center ajanga item sentong ya yanglua agir. Maneni Drop-in Center ajangasa lokti nung pei taküm tazüokba nung alitsü asoshi tangazükba agütsür.