Yim candidate sangdongba Village Council tem aitsür: ACAUT Nagaland

Dimapur, Tsüklai 22 (TYO): Nagaland nung election dak sendakba rara balala, nisung tepsettsü merangba aser ozüng alema inyakba mapatem ajanga ACAUT Nagaland aoksar, iba ya NBCC-i ayongzükba clean election aser linük democratic inyakyim anema lir, ta ACAUT Nagaland Chairman, Tia Longchar aser ACAUT member, Simon Kelio nati sangdong ka nung metetdaktsü.
“Mokokchung district kübok 19th Mile, Tuli anasa election dak sendakba nung nisung asüba osang angashia aoksar; item ama tatalokba ya tanga kecha masü, saka sowar mapa lir aser Naga nungeri iba atema aaktsüla. Item ama tatalokba nokdangtsü atema ketdangsertemi lendong ataloktsüsa aliba tesem ajak nung 144CRPC ozüng benoktsüla,” ta ACAUT Nagaland-isa metetdaktsü.
ACAUT Nagaland-isa yimer candidate sangdonga aliba Village Council tem aitsür, iba den külemi NPG’s kari village councils dang yimer candidate sangdongtsü atema rongshiba nung shilem agi, ta tai tonglokja alibaji NPG’s dang reprangshitsü mepishir, ta metetdaktsü.
ACAUT Nagaland-isa Administration aser ECI danga, vote agutsütsüurtemi ytimi vote agutsütsü, amomkmeren malitsü mesüra vote agutsüi aodang len tom nung memeakdaktsütsü atema yimer candidate sangdonga aliba tesemtem nung security sepaitem peria yoktsü mepishir, ta sangdong nungsa shia lir.
“ACAUT-i “solution before election” atema nokdaker, ajisüaka BJP-i meyipshishiba ajanga Naga nungeri election ang shimtsüsa akum, asser ibaji ajanga Naga nunger tamajung mapatem temai adokogo. ACAUT Nagaland-i tan election nung voters ajaki pei angatetba tajung nung shilem agitsü mepishir,” ta kasa sangdong ajanga metetdaktsü.