Yim pungui BRO dang Mokokchung-Mariani lenmang yanglutsü tuyur

Dimapur, February 7 (TYO) : Mokokchung district kübok yim pungu- Chungtia, Aliba, Kinunger, Khensa aser Mekuli nungeri Border Roads Organisation (BRO) dang Mokokchung nungi Mariani gari lenmang atema tezüluba nung takhangba ka agütsüogo.
Yim pungui BRO dang ita ana tsüngda Mokokchung nungi Mariani gari lenmang asoshi project plan tejangja ka yanglutsü aser mapang telatet aliba action plan ka agütsütsü atema takhangba agütsü aser ibaji meinyaktetra yim pungui gari lenmang shibangtsütsü ta shiogo.
Yaküm iba khuret ya yim pungi BRO den lemsatepogo aser idangji BRO-ia parnok dang iba khuret reprangshimtsü ta telangzüba agüja liasü. Ajisüaka, gari lenmang tamajungba akümba dak alaka tanü tashi kecha meinyak, ta shidi nung shia lir.
Shitakba agibo ghonda ana nung Mokokchung nungi Mariani tashi senzüteter saka lenmang onsara majungba agi tangbo ghonda 5 tashi agir, ta yim pungui BRO dangi züluba shidi nung shia lir.
Gari lenmang ongken agi sünger aser tzü taolen shitak maliba ajanga lenmang kanga mejungi kümogo. Kilometer 85 tasazük gari lenmang nung metre 20 shia ongkentem lir aser ongken karbo kanga tarok asüba agi gari mesüiteter. Ano tzünglu arudangbo ongkentem nung tzü atsüngdenba agi mesenzüteter, ta parnokisa metetdaktsü.
Iba lenmang nung gari tulutem khu bener mesenzüteter aser aiben lendong ataloker aser garitem lungreni longoka ayir. Iba lenmang ya Mokokchung, Zunheboto, Tuensang aser Longleng district pezü atema kanga tongtipang lir kechiyong iba lenmang ajanga Assam nungi chiyungtsü aser osettsüsettem belener.
Lenmang nung tesenzü mejungi akümba agi April 30, 2014 nü yimtsüng pungu den teyaritepertemi Mokokchung nungi tenzüka kilometer 15 tashi iba lenmang yanglushi.
Iba anogo nung angati nübo agütsür nisung 800 tashi adenshia yaritep aser yim pungu nungi lung, raw materials, road rollers, earth movers aser truck garitem tenlatepa lenmang yanglushi. Iba mapang sen lakh 40 tashi endoka inyak, yim punguisa BRO dangi züluba shidi nung shia lir.
Ano külen, April 30, 2014 nungi tenzüka Mokokchung District Truck Owners Association (MDTOA)-i Mokokchung-Mariani lenmang nung truck aser commercial vehicles mesenzütsü atema tenokdangba agütsü aser district pezü nung alirtem tang nüngdakba osettsüset aser chiyungtsütem peria mongui timtemer, ta parnokisa metetdaktsü.
Iba lenmang ya BRO-i anepalur saka gari lenmang tia angudang, BRO-i küm aika iba lenmang anepalu mesüi senzüka toktsüba sayur. Lenmang nung shilem kar yangluba aser ongkentem tokbangba ajanga majungtsü anungji high grade products amshia lenmang songjen yanglutsüla ta parnokisa BRO nem takhangba agütsüogo.