Yimchunger Students’ Union, Kohima küm 25 jungogo

Dimapur, July 12 (TYO) : 1990 nung Yimchunger Students’ Union, Kohima (YSUK) tenzükba sülen küm 25 ajungba nüngtem nung benjung mungogo.
Honibarnü State Academy Hall nung YSUK jubileemung nung PWD (Roads & Bridges) minister, Y. Vikheho Swu tongti tesemdanger liasü.
Vikheho Swu-i o jembidang YSUK nem küm 25 abensaba atema tenüngsang agütsü.
“Jubilee ya meyipa reprangshiba mapang ka lir aser iba mapang asenoki tesüibatem meyipa reprangshitsü aser takok o tamakok angubatem asadangtsüla. Iba sülen tarutsü atema renemtsüla” ta pai ayongzük.
Nagaland nung lokti tentet onsara aser Nagaland ya benjung lima ka dang masü saka lokti tentet lima ka lir, ta paisa ashi.
Asen state nung lokti tentet asoshi teinyaktsü reprangshima melentsüla aser kaketshir tentettem atema tongtipangtibaji shisaliok aser kaketshirtem jenjang ajungkettsü atema asütsüla, ta Swu-isa tayongzükba agütsü.
YSUK jubileemung sentong nung tetushia süa jaoker, Economics & Statistics aser Municipal affairs parliamentary secretary, R. Tohanba-ia o jembidang kaketshirtem dang meranga azüngtsü ayongzük.
Kaketshirtemi asen sobaliba metsüngareta wazüka ayutsüla aser telongjem nung alitsüla, ta Tohanba-isa ashi.
Paisa, kaketshirtem dang jenjang tajungtiba tongteta azüngtsü atema alizüng ayutsü ayongzük aser takok angutsü atema lenmang tezüba kecha mali ta ashi.
YSUK tir A. Khiungmong Yim-i tir o jembidang, YSUK ya July 11, 1990 nung A. Akum lenisüba kübok mezüng tenzük ta metetdaktsü.
Tesüiba mapangtem meyipa reprangdang YSUK-i item mapang lennirtemi nendaka aser bendanga inyakba atema kanga pelar, ta Khiungmong-isa shisem.
YSUK mezüngbuba tir A. Akum-ia o jembidang ashiba agi, YSUK tenzükba sülen nungi kaketshirtem aser Yimchunger kin ajungkettsü atema inyaka aru.
“Ano teinyaktsü aika lir, anungji asenok tashi itshitdi aser jubileemung tenüng nung taidok agütsüteper tarutsü atema meranga inyakdi” ta paisa ayongzük.
Sentong nung mendenji Asang.K liasü, ENSUK tiria o tatsüka jembi aser YSUK tongti tezülur Z. Mukamchim-i anküp tepela o jembi.