Yimer telongjemji telongjem ajak rongnung tulutiba aser tajungtiba S.Chuba Lkr

Mokokchung, February 21: Alima nung nübur tiptema aser alima ainba den tsüngkang medema aotsü asoshi nüngdak tongtipangtibaji telongjem, anungji telongjem akatsü asoshi nübur ajaki inyaktsüla ta Veterinary & Animal Husbandary Parliamentary Secretary, S. Chuba Lkr-i February 20 anogo Chuchuyimlang yimtak 43 Buba Chuchuyimlang Senso Joint Development Senden nung tetushi tejaoker o jembidang ashi.
Paisa yimtsüng ka nung yimer tsüngda nung telongjem lira ibaji telongjem ajak rongnung tulutiba aser tajungtiba, anungji asen yimtsüng tangar den liro medema aser tangar dang nungi temaba nung ajungkettsü asoshi yimer tsüngda telongjem alitsüla ta sentong nung adenshia aliba yimertem ayongzüka ashi.
S.Chuba Lkr-isa yimer tsüngda nung telongjem alitsüji yimer-o-yimer tsüngda temeim alitsü kanga dang nüngdaker, iba temeim mapa ya yimersa süaka yimtak alirtemi masü saka talisa yimer bendanglen alirtemi yimer asoshi teti bilema nentaka inyakba ajanga adoktsü ta paisa shisem.
Paisa, Marwari nungerbo parnok nisung kar shishilembabaren (business) nung takoksa ajurua tamakok jenjang nung lira paji akhi jenjang nung takok ngua ajungkettsü asoshi ajak sentepa yariteper, sakasa asenok nisungbo tamakok ajurur alidang yariteptsü melena paji menütsür, asenoki paji ajema kümtsür, saka pa takoksa ajurubaji ajanga yimer dangi takoksa bener arutsütsü, anungji akok tashi yimer tsüngda nung temeim agi nungita yariteptsüla ta ajungshia ashi.
Akhi putu mapang nung tongtipang asübatem tanü putu nungbo tongtipang masü, saka ano akhi putu mapang nung tongtipang masübatem tanü putu nungbo kanga dang tongtipang kümogo, anungji ibaji angateta kija shia meranga inyaktsüla, kechi tanü putu kanga dang karaa ainba mapang ka meranga meinyakra tangar memeneptsü, anungji züzüa meli-i meranga inyaktsüla ta S.Chuba-isa ashi.
Iba sentongji Rev. I. Meren Pongener, ABAM-i sarasadema tenzük aser Council Chairman Aosanen, VDB Secretary Süzümar, Thiameren Jamir Dimapur, Joint Director Veterinary & Animal Husbandary Dr.L.Temsü Ao, Agriculture Officer C.Alemyanger, Asstt Horticulture Officer Talimeren, Rtd.Director Soil & Water Conservation R.Nangshi, Deputy Mission Director SSA Talitemsü Jamir. General Manager DIC Tuensang T.Lipokwati nungertemi o jembi.
Sentong nung mendenji Junior Er. RD Block Peren Obangwati Pongener-i liasü aser Chuchuyimlang Baptist Arogo Pastor Limai sarasadema tembanga liasü.