Yimjung aser telongjem ajanga tebilemtsütem koktettsü: Rio

Mon, November 10 (TYO): Hokolbarnü MP (Lok Sabha), Neiphiu Rio-i nüburtem dang nija nükjidongtem yutsür yimjung aser telongjem atema inyaktsüla, kechiyong ibaji ajanga dang terenlok aser mapa manguba tebilemtsü kotettsü aser yimtenren latettsü, ta ashi.
Mon nung Totok Omlen yim tasen tentetba sentong nung jembidang Rio-i, sorkari iba yim tentettsü atema agizükba asoshi yimdaklirtem nem tenüngsang agütsü.
“Kodang yimjung aser telongjem lidir, asenoki tebilemtsütem koktettsü,” ta pai ashi.
Nagaland, Arunachal Pradesh aser Myanmar nung aliba Naga kin tulutibaji Konyak lir ta tenüngsang agüja tongti tesemdanger, Rio-i telongjemji kanga tongtibang anungji nenoki Naga nunger kin balala atema tatishitsü tajung sayuang, ta ayongzük.
“Iba tesem nung alirtem ya shisaliok aser terenlok nung ang tesülen atzüngzüka lir, ajisüaka nenok atsüngzüka mali, saka tanga Naga kintem den liromedema lir,” ta ashi.
Mon district indang Human Development Reports nung literacy rate tajemtiba shilem 57, per capita income tajemtiba aser life expectancy rate tajemtiba average küm 75 lir, aser iba dak sendakba nung Rio-i, tang tashi Nagaland nung nütsüng shilem 70 bo yimtsüngtem nung lir, anungji Konyak Union, gazetted officers, union balala aser nüburtemi Tizit district ama lenden tesemtem nung jila aser yimtitem amenoktsüla, koba ajanga rongsenkettsüng jenjang ajungkettsü, ta ayongzük.
“Anüdoklen aliba nisungtema khen mapang ka nungbo tesülen atsüngzüka liasü. Ajisüaka mapang ka nungbo parnok kanga renloka lendenleni oa alitsü tenzük, ibayongji yimtitem timbaka tzüyimkümlen, ayong anasa mesüra lenden nung amenoka angutsü. Ibaji ajanga item tesemji libalirotsü temelaba akumba dang masü saka shishilembaba ajanga parnok rongsenkettsünga kanga renlok,” ta ashi.
Paisa, Dimapur nungi Tizit tashi aser Arunachal Pradesh tashi railway yanglutsü atema agizükogo, iba den külemi kasa lenmang nung Four-Lane Expressway yanglutsü sentong lir, ta metetdaktsü.
Rio-isa yimdaklirtem dang kishikina yim ajak dang tesünep nung alitsü ayongzükba den klemi Konyak nungeri pa maneni nungita yariba atema pelaba lemsatep.
Rio-i Eastern Nagaland nung aliba kintem nem ambulance tenla agüja aru, aser pai Konyak nunger nema ambulance ka tenla agütsüogo.
Konyak Nyupuh Sheko Khong (KNSK)- Konyak Mothers’ Association-i iba ambulance service achayangtsüa akok, ajisüaka lokti tentettemi iba atemaji lemtetper district matsüngdang benoktsü atema Konyak Union-i achaayanga inyaktsü akok, ta paisa shisem.
Kasa sentong nung DUDA & NEPED Advisor, S. Pangnyu Phom-ia jembia liasü.
Iba sentong nungsa NRLM & Evaluation Parliamentary Secretary, Pohwang Konyak, Sericulture, Home Guards & Civil Defence Parliamentary Secretary, Namri Nchang, ENPO Tir, Khoiwang Konyak; Totok Chingha & Totok Omlen Angh, Khanjai aser Totok Chingnyu tongti Angh, Tongam nunger den sorkar ketdangsertem, tribal lenirtem, party ketdangpurtem aser kishikina yim balala nungi lenirtem dena liasü.