Yimjung atema tebilemtsü tulutibaji Syria: UN chief

United Nations, Rongchii 14 (Agencies) : Alima ajungalen yimjung yanglutsü aser taküm kümzüka alitsü atema tebilemtsü tulutibaji Syria lir, ta tanü Küptoknü UN chief, Antonio Guterres-i metetdaktsüogo.
Aji oda süaka, tensa tamajungba mekümdaktsütsü aser Syria nungertem nem tali timtem magütsüdaktsütsü atema ajaki kümdanga inyaktsüla, ta paisa ayongzüka metetdaktsü.
US, UK aser France linüktem longjemer par sepaitemi anünglen nungi Tir, Bashar al-Assad-i aniba Syria yimli anema apusoba mapang ka nung tang Guterres-i iba olenji metetdaktsür.
“US, France aser UK nungertemi anünglen nungi Syria anema inyakba osangji ni tsüngsü nepa angadagi. Tongtibangsa yimjung aser nüburtem taküm kümzüka ayutsü atema inyakba maparen nung United Nations Charter aser international law den jangyu medema aotsüla. Iba dak sendakba tebilemtsü indangji UN Charter nung tejangja shia lir,” ta paisa shisemogo.
Paisa ashiba agi, ‘international peace & security’ reprangtsü atema tongtibangtiba khuretji Security Council nem nunglokja lir asünung, iba mapaji longjemer inyaka aotsü asoshi Security Council züngsemtem achayangtsü nüngdaker.
Atangji tang iba tebilemtsü tulutibaji Syria lima lir, ta Guterres-isa nenshia shiogo.