Yimjung bushibalen

Yimjung indang jembitsü asoshi adenshiba mungdang ka Dimapur nung yakanü temogo. Iba mungdang nung yimjung yanglurtem aika adenshia jembiba onük rongnung Mahatma Gandhi-i yimjung asoshi inyakba jilu ajizüka yimjung asoshi inyaktsü ajungshitepa liasü. Atangji, tanü asen lima nung yimjung nüngdaker saka tashiyim agi yimjung bener arutsü makok. Aji oda, yimjung bushiba mapaji nisung ana mesüra telok ana raratepa aliba bendangtsübaji masü saka parnokji joko kodanga merarateptsü aser kati ka tsübua melii sadoksadoka alitsüsa tangatettep aser tesendaktep yanglutsübaji dang yimjung yanglutsür asütsü. Tanü asenok Naga nungertem rongnung raratepbabo anen saka yimjung mali aser India sepaitem dena rarabo anen saka yimjungbo mali, kechiyong rara anenaka terata aser mulungmelemtep agi sünga lir aser kati ka tsübuteper. Iba kasaji asenok nübortem rongnunga yimjung maliba agi pei kibong, pei yimtsüng aser pei lima merenloktetba timtem aika ajangshia arudagi. Ibaji asenoki yimjung bushir masü saka raratepba anendaktsütsü merangba mesüra meraratepi alitsü kija merangba agi shitakba yimjung mengutetter asütsü. Tetezü, raratep anendaktsüba aser yimjung bushiba na tsüngdaji mapa tasak teinyaktsü aika lir. Atangji, yimjung asoshi rara anentsüla saka yimjung alitsü asoshi raraji kong nungi adoker, koba agi jashir aser temulung masür, kechi tai aser koma asünung meraratepi putepa alitsü ta asüba kuli aser tebilemtsü tenzükdak bushitsü aser metettsü nüngdaker. Iba nung jagi dang teti yimjung nung alitsü asoshi tai nangzükba, taidok meshiba aser taidok agütsüba mapatem adoktsü. Itemjiang yimjung amendakdak aser yimjung tenzükdak lir. Tanü ama asen lima nung yimjung nüngdakba indang jembidang, tan Dimapur nung National Peace Convention mapang jembiba ama Mahatma Gandhi-i inyakba ama imyaka yimjung bushitsü ajungshiteper. Aji shitak lir.  Aji oda, asenoki Gandhi-i yimjung bushiba indang jembidang, pai tashiyim mamshi aser azü metokshii yimjung aser yimten nüchiso bushiba indang jembir anener. Atangji, tashiyim amshia yimjung bushitsü makok. Ajisüaka, Gandhi-i yimjung bushiba maparen nung tashiyim mamshii aser azü metokshii bushiba dang nungi tali awaloka inyakba mapa tongtibang ka lir, ibaji peisasa pei tai aser tashimait nangzükba liasü. Gandhii India nungertem asoshi yimjung aser nüchiso bushitsü dang pai pa taküm nung aibelenba aser ochimashi mapa inyakba tilateri ajak tamasa nangzük. Aji oda, Gandhi-i India asoshi yimjung nung nüchiso bushiba tongpang nung amshiba hadir tulutibajibo ochishia pei tai nangzükbaji liasü. Iba nung jagiang asenok yimjung yanglutsürtem aser yimjung bushirtem ajak asoshi tangazüktsü aser teinyaktsü tuluka reprangtetter. Asenok ajaki yimjungbo aginür saka pei tai aser tashimaitbo menangzükner, asenok aikati yimjungbo yanglutsüner saka pei tai aser tashimaitbo miimbanga ayutsü meranger, asenok aikati tangar den yimjung yangluner saka pei tai mangur saka tangar tai dang angur. Iba jagi ajaki yimjung aginür saka mangur, yimjung mungdang alir saka yimjung menepa moutetter. Atangji, yimjung ya khen bushir yutsütsüba mapa ka masü ibaibo taküm piyong inyaktsüba mapa ka lir. Aji oda, yimjung bushitsüba mapa ya nisung kar mesüra telok kar kisüng mapa masü saka senso ajak asoshi teinyaktsü tata shilem kaka asütsü. Ashiko, asenoki asen temeten dang bushiba agi asenok rongnung yimjung mebushitetter asütsüa akok. Aji oda, yimjung bushidang asenok temeten dang masü saka asenok teinyaktsü dena bilemdanga bushitsübaji kanga tongtibang asütsü. Asenoki yimjung aginüra tangari asenok dak temulung lemtettsüsa alitsüla, asenoki asenok tai nangzüktsüla, asenoki tangar jashiba deraji bushitsüla aser tashiyim agi masü aser azü tokshia masü saka asenoki asenok temeten meteta yimjung indang tasü itta jembitsüla. Kodang asenoki asen tai aser tashimait nangzükdir aser kodang asenoki asen temeten jungjunga angatetdir, idangjibo yimjung asoshi inyaktsü atema injang-bomb medeni asenoki tasü itta nokdaktettsü.