Yimjung bushirtem

Naga lima nung Naga nunger yimten nüchiso bushia bushia telok teimba teimba küma lemsar azü tokshia tsükchitepba agi tapayutsü Naga nunger taküm aika samaogo. Atangji, rongsentsütsü tesama takoksa jenti nguogo saka item takoksatemji nisung taküm samaba takoksa den medemdangtsü makok. Iba ama Naga nunger yimten nüchiso bushiba maparen nung mebilemdangi yiar amai inyakba ajanga tanü kibong aika amitsür kümer lir aser tanurtem aika tajung kümnüseta meküntet taküm raksadaktsüogo. Iba ama tsükchitepba mapang tetsübu agi Naga nunger Naga lima nung sadema mesenzütetba mapanga ajangshiogo. Mapang kabo lenmang nung rakzükratemer ajuru tsübuba agi aienlena tadongtsü ka matong tashibo kanga shisabolua senzüa liasü.Naga yimten nüchiso atema raratsüba tongpangtobo yutsür Naga nunger o Naga nunger na yimdong nung tashi arishitepa katepba mapang ka, Naga nunger tia ajung, Forum for Naga Reconciliation (FNR) telok tentet. Iba telok tentetba ya Naga lima nung arogotem nung lenirtem ajanga Tsüngremi Naga nunger dangi taochi yokba  mapa ka liasü ta tangang ano tejangjaba angatetter. Iba FNR telok ajanga Naga nunger yimten nüchiso bushir telok balala nungi tanishirtem jadena yimjung nung putepa alitsü asoshi nangzüktepdaktsür asüng June 13 nü küm 10 ajunger ta angashidang, Tsüngrem tenüng asanger aser FNR purtem dang pelar. Injang manung pei taküm agi tendanga Naga nungertem rongnung yimjung yanglutsürtemji FNR purtem ya lir. FNR telok tentetter külena Naga yimten telok balala nungi lenirtemi yimjung nung alitsü asoshi menangzüktep tashibo, Naga lima nung katepba manen. Iba ama tensa mapang ka nung telok o telok na tekatepdak tiayalong nunga FNR purtem tonga orr injang nokdangba tashi ataloka lir. Iba amaji parnoki Naga lima meima tasü itta inyakyong tanü asenok ajak yimjung nung tetsübu melii pei kidang litetter aser mapa inyakdaki sademsadema otetter. Ashi, tanurtem school-i yoktsü asoshia tarendaktsüka liasü. Tanü item ajakji bilemdangdang, atangji, FNR telok ajanga Naga nunger taküm aika samatsüba nungi kümzükogo ta angatetter. Atangji, taochi maka katepa liasüba kenyongi zep ta anendaktsür küm ter ajungbajia takok tuluka lir. Temenungratsü aser tebilemdangtsü kaji, FNR ajanga Naga yimten nüchiso bushir telok balala nungi jaoka yimjung nung putepa alitsü atema nangzükba kaket nung sign asürtem rongnung, Isak Chishi Swu aser SS Khaplang nabo iba lima nungi pilaogo. Tena meliaka, parnoki yanglua toktsüba yimjung meraksai tang tashi Naga nunger linük tenzükertem ajak putepa litetbaji ajak asoshi takok tuluka asütsü. Atangji, Naga nunger atema India goverment den yimjung yangluba aser Naga nunger o Naga nunger na tsüngda putepa aliba mapatemji tatem atongba ka masü saka Naga nunger yimten nükjidong atongtsü asoshi asentenshir tenzükba maparen ka dang lir. Joko, asenok tsüngda azü tokshiabo metsükchiteper aser India dena yimjung nung lir, saka asenok yimten aser rongsen jenjangbo alar tia nungsa lir. Yimjungbo yimjung saka tebokbo mesüngteter aser asenok sensopurtem ajak bendanger ozüng kübok alir. Aji oda, tang aliba yimjung mapang nung ya, ano asenok yimten aser rongsenren nung telongi talangka ludagi. Joko, asenok aikati tenüng agi yimten nüchiso busshir dang ashi, shitakba nungbo yimten nüchiso masü rongsen bushirang kümogo. Iba jagi asenok tangar bendanger yimsüsüba kübok yimten nung alar dang masü saka rongsen tsütsüa rongsen lar kümogo. Ibayongji, tanübo asenok yimtenren nung dang masü saka rongsenren nunga nüchiso bushitsü nüngdaker. Asenoki tuluka amao bilemer saka rongsen bushiba tsütsüa tangar bendangertemi dang shilem tulubalenkabo bener oa adoker, Iba jagi asenokbo sotsüa meyongshi aser yar-a majishi ta asüba tia nung lir. Joko, iba ama alar jenjang nung talangka malitsüsa, Naga nungertemi ano khen FNR nem tashi aser teyari agüja, Naga nunger putepa lidaktsüba jenjang nungi ano mera talila ka oa Naga yimten tebilemtsü ya takoktsüba aser tajungtiba jenjang ka nung yaktasa latettsüsa ajungshia inyakdaktsütsü junger