Yimjung ken o nung tetsürtemi shilem agitsüla: Angh

Kohima, August 24 (TYO): Northeast nung telungpur telok balala den yimjung ken o jembiba nung tetsürtem dendaktsütsü mapang tongogo, ta state Angh, P.B. Acharya-i ashi, ta Raj Bhavan sangdong ka ajanga metetdaktsü.
Tetsürtem aser tanurtem anema inyakbatem nungi kümzüka lidaktsütsüji tongtibang onük kümdaktsütsüla. Nagaland nung yimtenren aser kiojen kibur akümba nung tetsürtem shilem mali. Züngsem 60 aliba state assembly nung tetsür züngsem mali. Tetsürtem shibelenba ken o timtibaji North East nung lir, ta Angh-isa ashi.
Rara aliba tesemtem nung tetsürtem tamajungba kongshir. Parnokji tiyongtsü nung shilem agirtem lir. Tetsür telok balalai yimjung ken o nung tetsürtem dendaktsütsü akhangbaji süoki ia agitsüla.
Angh-i tiyongtsü nung shi,lem agirtem, lokti tentettem, mulungtet teloktem, kaketshir tentettem dang, yimjung ken o nung tesüiba mapangtem nunga tetsürtemi tongtibang shilem agia aruogo aser maneni parnoki shilem tajung agitettsü, anungji rara nokdangba aser yimjung ken o jembiba nung tetsürtem nem shilem agidaktsütsüla ta mepishia metetdaktsü.
Tanü Angh, P.B.Acharya-i indigenous Games, Fine Arts, Agriculture, Social Works aser Indigenous herbal medicine nung tangar dak nungi alakteta inyaktetertem nem sempettem agütsü.
“North East, talisa Nagaland ya sobaliba takar aliba tesem lir. Asenoki nüma tangtanga asen tsüngsang, kentenmenü, teka mapa aser sü atakba mapatem alima dang sayaogo. Iba luyim nung asenok temaba jenjang nung lir,” ta Angh-i ashi.
Angh-isa, asenoki social workers, yimtenren lenirtem, linük meimertem, Doctor tem, Engineer tem, kenshi oshirtem aser saisaponger takotettem sayatsü mapang tongogo, ta shiogo.
Iba dak sentakba nung Angh-i Nagaland nung Deputy Commissioner ajak dang shidi ajanga, item luyim balala nung takotettem jangjatsü aser talisa Indigenous games mongintem aser Indigenous medicinal doctor tem jangjatsü metetdaktsüogo, ta Raj Bhavan sangdong nungsa shia lir.