Yimjung olemtep tembangba atema pelar: NH

Dimapur, November 1 (TYO): NSCN/GPRN aser India sorkar tsüngda küm 22 tashi yimjung olemtep liyonga aruba sülen tekong merangtepba mapa ka ajuruba tensa ka ajuruba ajanga Naga nunger tetsübu aser tarendak tia ka nung liasü. Ajisüaka, October 31, 2019 nü New Delhi nung angatettepa yimten olemtep tembangba osang angashidang kanga pelar, ta Naga Hoho-i ashi.
Onük angatettepba atema Naga Hoho-i Interlocutor Mr. RN Ravi aser NSCN (I-M) lenirtem nem tenüngsang agütsür. Maneni, India Prime Minister Narendra Modi aser Union Home Minister Amit Shah nato Indo-Naga yimten ken o lemtettsü temulungtetba aliba atema tena nem tenüngsang agütsür, ta Naga Hoho Tir HK Zhimomi aser Tongti Tezülur K. Elu Ndang nati ashi.
Naga nungeri Naga lima nung yimjung aser tesünep nung linür aser kobi melii iba ya asangsang nung ataloktsü imlar. Civil society tem, lokti balala, arogotem aser Naga nungertemi teti pusema nungitba aser sarasademtsüba atema kanga pelar, ta tenatisa ashi.
Olemtep tembangba atema tenüngsang agütsür aser pelashishia agizüker aka kasa mapang nung India sorkari lateta aliba onüktem nung ajemdaker Indo-Naga Political Agreement nung sign süteptsüla, ta Naga Hoho mendenpurtemisa metetdaktsü.
“Asenoki yimten tsütsü putu tasen ka nung ayaoka ayir asü nung, sendaka alir ajaki tebilemtsü tuluba abentsüsa akümtsü. Naga nungertemi telongjem aser putepshiba aginür anungji Naga yimten telok ajak aser talisa NSCN/GPRN aser 7 NNPGs külemi longjemtsüla” ta tenatisa ashi.
“Naga Hoho-isa Naga nunger ajak, Kin Hohotem aser Civil Society temi asenok mangatettep agiener longjemtsü ayongzüker. Naga yimten atema tatembang tenangzüktep nung sign masüdang asenok longjemdi aser kümdanga lidi,” ta HK Zhimomi aser K. Elu Ndang nati metetdaktsü.