Yimjung tangatetba nung Pakistan-i tanü IAF Pilot chioktsü

New Delhi, February 28 (Agencies): Bodbarnü Pakistan-i apuba IAF Wing Commander Abhinandan Varthaman Hokolbarnü chioktsü ta Pakistan Prime Minister Imran Khan-i metetdaktsü.
Parliament nung jembidang Imran Khan-i yimji-yimjung tangatetba nung pa chioktsü ta ashi.
Yashinep India aser Pakistan tsüngda tayimtsütem amshia raradang IAF pilot Abhinandan indang tayimtsü Line of Control adena orr tsükok aser idangji pa Pakistan-i apu.
“Asenoki yimjung aginüba atema, asüng Pakistan-i Indian Air Force ketdangser chioktsü. Iba ya asenoki olemteptsü mulunga lir ta asüba mera mezüngbuba asütsü” ta PM Imran Khan-i ashi.
“Asenoki tensa süngjemdaktsütsüla saka yimjung aginüa inyakba ya tashi maitba inyakyim ka ama mebilemtsüla. Shingaia rara makoker. Asenoki mekümdangi telemtetba magitsüla. Mekümdangi telemtetba agiba ajanga linüktem samaogo” ta Pakistan Prime Minister-isa ayongzük.
India den meputep adoka aliba angatetteptsü atema Pakistan-i Wing Commander Abhinandan chioktsü mulunga lir ta tanü foreign minister Shah Mehmood Qureshi-i ashi.
India aser Pakistan nungi osang tajung kar angazükogo ta US President Donald Trump-i osang ka metetdaktsüba sülen ghonda ishika ka lir Pakistan-i IAF Wing Commander chioktsüba osang sangoktsü.
Pakistani nunger tayimtsü 20 shi kati ozüng alema Indian airspace telungi ait aser Jammu & Kashmir nung mitkar alidak amaktsü merang saka IAF-i parnok meindok, ta sorkar osang ka ajanga ashi.
India sorkari Pakistan dang pilot taküm kümzüka ayutsü jangjajangja metetdaktsü. Pakistan-i International Humanitarian Law aser Geneva Convention alema parnoki apuba sepai indang video ka prokshi ta India-isa aitsü.
Wing Commander Abhinandan Varthaman kidangi meyipa arutsü atema kanga pelar ta Brihostibarnü Indian Air Force (IAF)-i metetdaktsü.
Iba ya Pakistan-i tangatetba tajung nung inyakba mapa ka asü ta osangbeneri asüngdangdang IAF ketdangseri “Iba ya Geneva Convention nung aliba ama inyakba mapa ka ta onoki agizüker” ta langzü.
Pakistan Prime Minister Imran Khan-i Indian Air Force pilot chioktsü ta asüba osang metetdaktsüba sülen Prime Minister Narendra Modi-i kanga dang temaba jenjang nung senden kja ayonga amen.
Iba senden nung Army, Air Force aser Navy nungi Chief 3, National Security Advisor Ajit Doval, Finance Minister Arun Jaitley, External Affairs Minister Sushma Swaraj, Home Minister Rajnath Singh aser Defence Minister Nirmala Sitharaman nungertem aden ta osang ka ajanga ashi.
Prime minister’er kidang ayonga amenba senden nungsa tanga tongti ketdangser aika aden, ta osang ajangasa shisem.